Чөөн чүк календары езугаар келир чылдың демдээ — Ногаан Ыяш Чылан. 2025 чылдың ээзи Чылан каас-шиник чуртталганы үнелээр, ынчангаш Чаа чылдың ширээзи аңаа дүгжүр ужурлуг. Ындыг-даа болза столга камчатканың крабтары, фуа-гра дээн ышкаш нарын чемнер салыры албан эвес.
Байырлал ширээзинге ногаа-чимис аймаа элбек болза эки. Чылан нарын чүүлдерге ынак болганда, хоюг, чаагай далай продуктыларын база балыкты шилип алза эки.
Чылан араатан амытан дээрзин база утпаалы, ынчангаш эъттен кылган чемнер чок болза, база болдунмас. Эът — бай-шыдалдың болгаш чечектелиишкинниң демдээ, кара күштерден камгалал. Чылан тоолай эъдинге эң-не ынак, ынчангаш ооң эъдин быжырып азы какпактап ап болур.
Чылан чигирзиг чемге ындыг-ла күзел чок. Ынчалза-даа Чаа чылдың ширээзин камгалал болгаш элбекшилдиң демдээ тоорук аймаа-биле (тооруктан кылган чигирзиг чемнер), чигирзиг амыдыралдың демдээ – ары чигири база чимис аймаа-биле каастап болур.
Салат «Чылан»
Бо чаагай амданныг салат байырлал столун каастаар. Ылаңгыя аалчыларны чылан дүрзүзү дыка сонуургадыр.
Херек чүүлдер: 4 картофель, 4 чуурга, 200 грамм быштак, 2 банка үстүг горбуша, 250 г майонез, чеснок, маслинылар болгаш маринадтаан огурецтер.
Кылыры: картофельдер биле чуургаларны хайындырар. Горбушаны тавакка салгаш, серээ-биле чуура идер. Быштак, картофель болгаш чуургаларны дүрбүүшке дүрбүүр. Шуптузун холуй былгааш, тавакка салгаш, чылан дүрзүлүг кылдыр кылгаш, маслинылар биле огурецтерни төгериктей доорааш, каастаар.
Чем чиртингир болзун!
“Шын” № 98 2024 чылдың декабрь 21