“Кадыкшыл” национал төлевилелдиң кадык камгалалының баштайгы чадазынга чаартылгалар чорудар программазы-биле келген чаа Миндрей ДС 60 деп УЗИ аппарадын Консультация-диагностика төвүнде тургускан. Чаа-ла ийи ай ажыглап эгелээни чаа дериг-херекселиниң ачызында муң ажыг шинчилелдерни эмчилер чоруткан.
Чаа аппарат-биле ажылдап турар эмчи Болат Борисович Хаплак 2012 чылда Красноярскиниң күрүнениң эмчи университедин дооскаш, интернатураны 2013 чылда хирургия талазынга эрткеш, “Көдээ черниң доктору” деп программа-биле Тожуга ажылдап турган.
“Ырак-узак кожуун боорга, ынаар ажылдаар күзелдиг эмчилер эвээш боор. Ынчангаш эмчи кадрлар кезээде ында чедишпес. Ылаңгыя кезиишкин негеттинип турар аарыг улусту баштай УЗИ-ге шинчилеп көөрү албан. Ынчангаш мени Алтайның күрүне университединче чоруткан соонда, ол талазы-биле билиг бедидери-биле өөренген мен”- деп, эмчи чугаалаан.
Бо эмчи Сүт-Хөлге, Мөңгүн-Тайгага, Бии-Хем кожууннарга болгаш республикадан дашкаар база хирург эмчи болуп ажылдаан. Амгы үеде Консультация-диагностика төвүнде УЗИ эмчизи болуп ажылдап турар.
«Чаа аппараттың ажыглалы көңгүс бөдүүн боорда, хөй аргаларлыг. Ооң кадында мурнунда ажыглап турганывыс аңаа дөмей аппараттардан күштүг, кижиниң организминде көңгүс билдинмес өскерлиишкиннерни безин илередиптер-дир. Ооң мурнунда башта дамырларны эрги аппараттар тода көргүзүп шыдавас турган болза, ам чаа аппарат дузазы-биле ол болгаш өске-даа чүүлдерни шиитпирлептер аргалыг бис” –деп, УЗИ эмчизи Болат Хаплак чугаалаан.
