Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Чаа хүрээде билиг бедидер курстар

18 сентября 2023
18

Кызыл хоорайда Тубтен Шедруб Линг – Будда Шакьямуниниӊ Өөредиин тайылбырлаарыныӊ болгаш боттандырарыныӊ ораны деп хүрээде лама башкыларга өөредилге курстары эгелээн.


«Сарыг шажынныӊ башкыларынга болгаш аныяктарга социал-гуманитарлыг эртемнерниӊ үндезин билиглери» деп Президентиниӊ грант төлевилелин Тываныӊ күрүне университединиӊ боттандырып эгелээни ол.

Төлевилелдиӊ байырлыг ажыдыышкынынга Тываныӊ кожууннарында хүрээ-дуганнарныӊ башкылары, Камбы-лама Гелек Насык-Доржу, ТывКУ-нуӊ эртемденнери, республиканыӊ Чазааныӊ кежигүннери, Күжүгет Шойгу аттыг культура фондузунуӊ күүсекчи директору Аяс Лопсан, «Тыва» биле «Тува-24» телеканалдарныӊ журналистери, Кызыл хоорайныӊ өөредилге черлериниӊ студентилери киржип турган.

«Бо төлевилелди амыдыралга херек кырында боттандырып эгелээринге үлүг-хуузун кииргени дээш Тываныӊ күрүне университединиӊ удуртулгазынга, Ольга Матпаевна Хомушкуга, Сарыг шажын эртеминиӊ өөредилгезин деткиир фондуга амы-хууда өөрүп четтиргенимни илередирин чөпшээреп көрүӊер. Бо курстарга сарыг шажынныӊ, Тываныӊ болгаш Россияныӊ төөгүзүн каксы өөредир.

Республикада ном-судурларныӊ хөй кезии эрги моол бижик кырында. Эрги моол бижикти база маӊаа шинчилеп өөренир бис. Оон аӊгыда, шажын-чүдүлге организацияларыныӊ удуртукчуларынга бо курстар база тааржыр дээрзин немей чугаалап каайн. Чүге дизе шажын организацияларыныӊ ачы-буян чедирер ажыл-чорудулгазын хоойлу-дүрүмнүг кылдыр таарыштырарын, Россия Федерациязынга шажын-чүдүлге ажыл-чорудулгазыныӊ нормативиг хоойлу-дүрүмүн, өнчү-хөреӊги хамаарылгаларыныӊ дугайында маӊаа билип ап болур. Хостуг эргезин болгаш чүдүп-сүзүглээр эргелерин хажытканы дээш харыысалгалыг болурунуӊ дугайында база тайылбырлаар»– деп, Тываныӊ Камбы-ламазы Гелек Насык-Доржу чугаалаан.

«Бо курстарга тыва дылда сарыг шажынныӊ терминнерин, моол болгаш тибет дылдан үлегерлээн сөстерни таныштырар, орус биле тыва дыл талазы-биле ханы билиглерни өөредир. Кижилер-биле эп-чөптүг чугаалажыр психология аргаларын, чөрүлдээлиг берге байдалдарны шиитпирлээр технологияларны база шиӊгээдир. Философияныӊ, буддизмниӊ төөгүзүн, Тываныӊ хүрээлериниӊ өөредилге системазын, Тыва Арат Республикага үндезин шажын-чүдүлгениӊ байдалыныӊ дугайында кичээлдерни база эрттирер. Өөредилге курстары октябрь 29-ка чедир болур. Ону чедиишкинниг өөренип доосканыныӊ дугайында шынзылганы алыр»– деп, ТывКУ-нуӊ ректору, философия эртемнериниӊ доктору Ольга Хомушку демдеглээн. Лама башкыларынга билиг бедидер курстарны Күжүгет Шойгу аттыг культура фондузунуӊ деткимчези-биле эрттирип турар дээрзин ол тодаргай чугаалаан.

«Тываныӊ сарыг шажын чүдүкчүлерин каттыштырып, республикага сарыг шажынны улаштыр сайзырадып хөгжүдеринге делгем аргаларны бо төлевилел тургузуп берип турар. «Сарыг шажынныӊ башкыларынга болгаш аныяктарга социал-гуманитарлыг эртемнерниӊ үндезин билиглери» деп төлевилелдиӊ шугуму-биле онзагай өөредилге курстарын чогуур херек үезинде эгелеп турар. Шупту эки чүүлдер баштай кижиниӊ угаан-бодалындан эгелээр. Иштики сагыш-сеткили байлак болза, кижи даштыкы делегейже чаа көрүштүг болур» – деп, Тыва Республиканыӊ Чазааныӊ оралакчы даргазы Алик Монгуш чугаалаан.
Шажынчы өөредилге-кижизидиге ажылын кылып чорудуп турар хамаатыларны база билиг бедидер курстарже чалап турар.

Р. Демчик белеткээн.

Чуруктарны интернеттен алган.


"Шын" №70 2023 чылдың сентябрь 16