Тываның Баштыңы Владислав Ховалыг өөредилге сайыдынга Елена Самбаланы томуйлаар дугайында чарлыкка атты салган. Тываның өөредилге адырының чаа удуртукчузу бо албан-дужаалга Елена Хардикованы солуур.
Чаа сайыттың мурнунга регионнуң Баштыңы өөредилгениң шынарын экижидер сорулганы салган. Оон аңгыда, республиканың школаларында тудуглар болгаш капитал септелге айтырыгларын, чаа өөредилге чылынга өөредилге черлериниң белеткелин онза хайгааралга тудары чугула.
Елена Самбала улуг класстарга математика, физика башкызы эртемниг. “Өөредилге менеджментизи” кылдыр билиин бедиткен.
Өөредилге адырында 1992 чылдан тура ажылдап келген. 10 ажыг чылды Чадаананың 2 дугаар школазынга математика башкылаан.
2003 чылдан 2009 чылга чедир Тываның билиг-мергежил бедидер институдунга ажылдаан.
2009 чылдан 2017 чылга чедир өөредилге адырында Хыналда болгаш хайгаарал албанынга удуртур албан-дужаалдарга ажылдап чораан. Ол Тыва Республиканың өөредилге яамызынга хыналда, хайгаарал эргелели турган. Ооң соонда Ажыл-чорудулганың янзы-бүрү хевирлерин хайгаараар, чөпшээрел бижик бээр талазы-биле ажылдаар албан кылдыр эде тургустунган.
Ол ооң соонда Тыва Республиканың Өг-бүлелер болгаш уруглар ажыл-херээниң талазы-биле агентилелдиң директорунуң оралакчызынга ажылдаан.
Бистиң корр.
Чурукту интернет четкизинден хоолгалаан.
"Шын" №56 2024 чылдың июль 27
