Октябрь 9-та Тываның Национал ойнаар-кыстар театры 12-ги театр сезонун «Сказочный мир Муминов» деп чаа шииниң баштайгы көрүлдези-биле ажыткан.
“Шииде швед дылдыг Туве Янссон деп чогаалчының скандинав тоолчургу чугааларга үндезилеп бижээни тоолунуң маадырлары, тывызыксыг Муми-трольдарның (троль — тоолда чогаадып каан кижи дүрзүлүг амытанчыгаштар) чаптанчыг ужуралдарының дугайында көргүзүп турар. Ол чараш амытанчыгаштарны долганган болуушкуннар, оларның онза таварылгалары чаштарны сонуургадыр дээрзинге чигзиниг чок. Эки сеткил, каткы-хөглүг оюн-баштак долган болгаш манавааны ужуралдар колдаан шии – бичии көрүкчүлерге чоок болгаш билдингир байдалды тургузуп турар” – деп, шиини тургускан режиссёр Светлана Ондар демдеглээн.
Чаа шииде артистер ыяш мергелерде быжыглаан ойнаар-кыстарны колдадыр ажыглап, тоолга оларны “диргизип”, уругларны хуулгаазын аргалыг тоол оранынче аян-чорук кылырынче эдерти бээри сонуурганчыг.
Ол хүн чаа шиини сонуургап келген бичии көрүкчүлер зал сыңмас болган. Кызылдың школаларының башкылары сургуулдарын бүдүн клазы-биле эдертип келгеш, шиилээни онзагай: «Уругларның культура сайзыралын бедидери-биле Ойнаар-кыстар театрынче удаа-дараа шии көрүп кээп турар бис. Шак мындыг хемчеглерге уруглар бот-боттарын канчаар алдынарындан эгелээш, хөй чүүлдерни билип ап турарлар. Ооң кадында бо театрның шиилери колдуунда кижизидилге талазы-биле айтырыгларны көдүрүп турары-биле сургуулдарга өөредиглиг болгаш дыка ажыктыг. Ынчангаш бистиң уругларывыс бээр театрлаарынга дыка ынак. Шупту күзелдии-биле кээп турар” — деп, Кызыл хооайның 1 дугаар школазының 2”Б” клазының башкызы чугаалаан.
Чаа шииден бичии көрүкчү езулуг найырал деп чүл, бергелерни ажып эртип чорааш, сорулганы чедип алыр дээрзин база өг-бүлениң үнелелдериниң дугайында билип алганнар.
Тываның Национал ойнаар-кыстар театрының бо чаа тургускан шиизин ТАР-ның Совет Эвилелиниң хүрээлеңинче эки туразы-биле каттыжып киргенинден бээр 80 чыл оюнга тураскаадып көргүскенин сагындыраал.
Сорунза МОНГУШ.
Буяна Ооржактың тырттырган чуруктары.
«Шын» №78 2024 чылдың октябрь 12
