Чаа школаже орук

Таңды кожууннуң Балгазын суурунда чаа школа тудуу доозулган. 2024–2025 чаа өөредилге чылында суурнуң өөреникчилери амгы үениң негелделеринге дүүштүр кылган, бүрүнү-биле дериттинген кончуг-даа чараш школага өөренип эгелээр аас-кежиктиг болганнар. Ук школаже баар орукту асфальтылап кааны база эки. Ынчалза-даа Степная кудумчузунда 2–1 деп бажыңның чаны-биле эрткен орук бичии чаштарга-даа, улуг-даа улуска, чолаачыларга-даа айыылдыг байдалды тургузуп турар дээрзин суурнуң чурттакчызы Татьяна Ховалыг демдеглээн:

“Мен мында барык 40 чыл чурттап тур мен. Ооң мурнунда бо кудумчунуң оруу багай турган. Асфальтылап кааны эки-дир. Чаңгыс-ла таарзынмайн турар чүүлүм ындындан келген машинаның чолаачызынга бажың артындан кылаштап кел чыткан кижи көзүлбес. Орукту бажыңче аргажок чоок кылдыр база кылып каан. Чаңгыс бо кожамда безин 5 ажы-төл бар. Школа баар өөреникчилерге таарымча чок болгаш орук шимчээшкининге айыылды тургузуп турар. Ынчангаш бо орукту айыыл чок кылдыр кылып бээрин диледим”.

Балгазын сумузунуң чагырга даргазы Павел Попиков бо орукту айыыл чок кылыптар аргазы бар дээрзин тайылбырлаан: “Степная кудумчузунда школа чоогунда хенертен ээр чер бар. Сумунуң чурттакчызының дилээ ёзугаар чурттакчы чоннуң кадыкшылынга болгаш амы-тынынга айыыл тургуспазы-биле айыыл тургузуп турар орук кезиндээниң ийи кыдыынга эрткен-дүшкен машиналар дүрген халытпас кылдыр достайтыр кылып каан шаптараазыннарны тургузар сорулганы салган. Ол ышкаш маңын дүргедетпес кылдыр база бо черлеп бичии уруглар эртип турарын чолаачыларга сагындырып турар орук демдектерин салыптар болза, ынчан бо орук айыыл чок болур”.

Хоочун чурттакчының баш удур айыыл тургузуп болгу дег черни сагындырып турары кончуг эки. Школа директору база хоочуннуң саналын чүүлдүгзүнүп, хүлээникчи организация чогуур ажылдарны чорударын дыңнаткан. Удавас өөредилге чылы эгелээрге бо оруктап хөй-ле школачылар аай-дедир аргыжып эгелээр.

Чыжыргана СААЯ.
Ада Тюлюштуң тырттырган чуруктары.

«Шын» №66 2024 чылдың август 31