Январь 20-де Тываның Чазааның Аппарат хуралынга республиканың Баштыңы Владислав Ховалыг экономиктиг сайзырал болгаш үлетпүр сайыдынга Аяс Баянны томуйлаанын дыңнаткан. Ол ооң мурнунда «Росбанкының» регионалдыг салбырын удуртуп турган, банк адырында ниитизи-биле 27 ажыг чыл ажылдаан.

«Банкының салбыры ооң удуртулгазы-биле эң-не эки ажылдыг деп демдегледип, үүрмек бизнести сайзыраткан — деп, Владислав Ховалыг бодунуң шиитпирин тайылбырлааш, демдег- лээн. — Аяс Санааевич бистиң мурнады боттандырар угланыышкыннарывысты кончуг эки билир. 2022 чылда «Чаңгыс демниг Россия» партиядан найысылалдың Төлээлекчилер хуралының составынче соңгуткан. Бо хүнге чедир Кызылдың Төлээлекчилер хуралында саң-хөө-экономика айтырыглары болгаш сайгарлыкчы чорук талазы-биле комитетти баштаан».
Аяс Баян Иркутскунуң банк школазын дооскаш, Н.Ф. Катанов аттыг Хакасияның күрүне университединге экономист эртемни чедип алган. Тываның банк адырынга аңгы-аңгы чылдарда ажылдаан: Тываның Национал Банкызының, «Сибирское ОВК" банкының специализи. Сөөлгү 20 чылда Росбанкының Тывада салбырының директору. «Чаңгыс демниг Россия» партияның кежигүнү, идепкейжи хөй-ниитижи, Тыва Республиканың Дзюдо федерациязының вице-президентизи.
Бистиң корр.
“Шын” №2 2025 чылдың январь 23