Тываның Баштыңы Владислав Ховалыг ТР-ниң Чазааның Даргазының оралакчызының албан-хүлээлгезин күүседири-биле, Виталий Бартына-Садының орнунга Айдыс Сынааны томуйлаан.
«Тыва Республиканың Баштыңының меңээ бүзүрели дээш өөрүп четтирип тур мен. Эң чугула даалгалар дугайында чугаалаштывыс. Интернет четкизин таварыштыр бузурукчу чорук кылырынга удур профилактиктиг хемчеглерни күштелдирери чугула. Дыка хөй чаңгыс чер чурттугларывыс үптекчилерге мегеледип, улуг түңнүг акша-төгерикке өреленип турар болгай. Ынчангаш баш удур комплекстиг хемчеглерни чорудуп, ындыг чоруктарны болдурбайн барып болурунуң аргаларын дилээри чугула. Чаштарны болгаш элээдилерни күштээшкинден камгалаар аргаларны социал адырда коллегаларым-биле кады ажылдап кылыр бис. Республиканың удуртукчузу ук айтырыгга хамаарыштыр кылыр ажылдар хөй дээрзин демдегледи» – деп, Айдыс Сынаа чугаалаан.
Айдыс Сынаа томуйлаткан хүнүнден эгелеп ТР-ниң Чазак Даргазының оралакчызы Орлан Сарыглар-биле кады кожууннарже үнүүшкүннерни кылып эгелээн. Тес-Хем кожууннуң О-Шынаа сумузунуң чурттакчызындан назы четпээн кыс уруун күштээн дугайында хомудал кирген. Ынчангаш Орлан Сарыглар биле Айдыс Сынаа тус черде хыналданы чорудуп, профилактиктиг ажылдарны организастап эгелээн. Ук айтырыгга хамаарыштыр чогуур ажылдар чоруттунган соонда, кеземче херээн оттурар.
Найысылалда болгаш кожуун төптеринде арага чажырып садып-саарып турар эрге-чагырга ээлээн даргаларны база оларның чоок кижилерин тодараткаш, хемчээн алыры болгаш социал адырның оон-даа өске чидиг айтырыгларын чаа томуйлаткан оралакчы харыылаар.
Айдыс Сынаа 1985 чылдың март 21-де Эрзин кожууннуң Бай-Даг сумузунга төрүттүнген. 2007 чылда Барнаул хоорайда Россияның ИХЯ-ның юридиктиг институдун, 2014 чылда Россияның шүүгү (правосудия) академиязын дооскан. Истелге органнарынга, прокуратурага болгаш Тыва Республиканың күүсекчи эрге-чагырга черлеринге удуртукчулап база хууда болчукчулап, «Опора России» Бүгү-российжи хөй-ниити организациязының Тывада регионалдыг салбырынга удуртукчулап чораан.
А. ОНДАР белеткээн.
“Шын” №50 2024 чылдың июль 6