Тываның Баштыңы Владислав Ховалыг мооң мурнунда хөй аалдыг бажыңнарның капитал септелгезиниң коммерцияга хамаарышпас регионалдыг фондузун директорлап турган Мерген Дагбаны чуртталга-коммунал ажыл-агыйның чаа сайыдынга томуйлаан чарлыкка атты салган. Ол Мерген Мынын-оолду солаан.
Мерген Балыкаевич Дагба Өвүр районнуң Хандагайты суурга төрүттүнген. 1986 чылда ССРЭ-ниң ИХЯ-зының Воронежте милицияның тускай ортумак школазын, 2005 чылда Сибирьниң күрүне албанының академиязын дооскан.
Күш-ажылчы базымын Хандагайты суурда кожууннуң харылзаа белдиринге монтёржулап эгелээн. Тыва АССР-ниң ИХЯ одуруунга, Тыва Республиканың ИХЯ-га албан ажылын күүсеткен.
2016 чылдан хөй аалдыг бажыңнарның капитал септелгезиниң коммерцияга хамаарышпас регионалдыг фондузунга ажылдап турган болгаш, республиканың чурттакчылыг черлериниң чуртталга-коммунал ажыл-агыйының чидиг айтырыгларын эки билир.
2022 чылда ТР-ниң Чазааның Даргазының оралакчызы – одалга болгаш энергетика сайыды албан дужаалды күүседир кылдыр томуйлаткан, республиканың чуртталга-коммунал ажыл-агыйын сайзырадырының, чылыг-энергетика комплекизин өйлеп-таарыштырарының база хөгжүдериниң айтырыглары-биле ажылдаан.
Республиканың коммунал инфраструктуразын үндезини-биле чаартылгазы негеттинип турар. Амгы үеде республикада 2023 чылдың эгезинде федералдыг эрге-чагырга органнарынга регион Чазааның камгалап алганы коммунал инфраструктураны эде чаартырының программазы күүсеттинип турар.
Документиде алды амыдырал-хандырылга объектилерин эде чаартыр хемчеглер бар. Кызыл хоорайда үш чылыг хандырылгазының, бир суг хандырылгазының объектизин, Шагаан-Арыг хоорайда суг хандырылгазының база суг аңгылаарының бир-бир объектизин бүрүнү-биле чаартыры планнаттынган. Ниитизи-биле 32 км инженер четкизин солуп, чаартыры көрдүнген.
Чаа сайыттың мурнунда оон аңгыда, боктар-биле ажылдаар регионалдыг операторнуң ажылын кылып турар «Транспорт сервизи болгаш төлевилел» КУБ-туң ажылын экижидер даалга база бар. Сөөлгү үеде чурттакчылыг черлерде тургускан бункерлерден бокту үе-шаанда чүдүрүп сөөртүр регоператорнуң ажылынга хамаарыштыр хереглекчилерден хомудалдар бар.
ТР-ниң Чазааның парлалга албаны.
"Шын" №52 2024 чылдың июль 13
![](https://shyn.ru/media/cache/2024/07/15/c8w8ght0xp8-80f2cfebdc.jpg)