Аппарат хуралының үезинде Тываның Баштыңы Владислав Ховалыг регион чазааның составында чаа кадрларны томуйлаанын дыңнаткан. Эдуард Сандан Тыва Республиканың Чазааның Даргазының оралакчызында томуйлаткан болза, Артына Бузур-оол оралакчызының хүлээлгезин күүседир. Күш-ажыл болгаш социал политика, ол ышкаш чурагайлыг хөгжүлде яамыларында база чаа удуртукчулар томуйлаткан.
Эдуард Сандан 2006 чылдан бээр күрүне албанында ажылдап чоруур. Сөөлгү ажылынга томуйладырының мурнунда Саң-хөө яамызынга харыысалгалыг албан-дужаалдарны ээлеп, Красноярск край, Хакас Республика, Тыва Республика талазы-биле федералдыг күрүнениң статистика албанының удуртукчузунуң оралакчызы чораан. 2021 чылдан бо үеге чедир Тыва Республиканың күш-ажыл болгаш социал политика сайыды албан-дужаалга ажылдаан.
«Ооң профессионал шынарларын болгаш арга-дуржулгазын өөренип көргеш, Эдуард Феликсовичиге экономика, орук ажыл-агыйны, туризм, чурагайлыг хөгжүлде, күрүне садыглажыышкыны, ол ышкаш чер болгаш өнчү-хөреңги айтырыгларынга хамаарышкан айтырыгларны таарыштырып-дүүштүрер харыысалганы хүлээдип бээрин шиитпирледим» – деп, Владислав Ховалыг чугаалаан.
Тыва Республиканың Баштыңының Администрациязы болгаш ТР-ниң Чазааның Аппарат удуртукчузунуң оралакчызы база иштики политика департаментизиниң удуртукчузу Артына Бузур-оолду Тыва Республиканың Чазааның Даргазының иштики политика талазы-биле оралакчызының хүлээлгезин күүседир кылдыр томуйлаан. Владислав Ховалыг элээн каш чылдарда регионнуң иштики политика айтырыглары-биле ажылдап келген арга-дуржулгалыг специалист деп ону демдеглээн.
Күш-ажыл болгаш социал политика яамызының чаа удуртукчузу кылдыр сайыттың оралакчызынга хөй чылдарда ажылдаан, республиканың чурттакчы чонунга социал хандырылга айтырыгларын харыылап чораан Орланмай Куулар томуйлаткан.
«Яамының шупту угланыышкыннарында ажылдар силерни манап турар. ТШО киржикчилериниң өг-бүлелеринче, ооң иштинде Дээди Хуралга Айыткалымда айыттынган хемчеглерже онза кичээнгейни угландырары чугула»– деп, Владислав Ховалыг чаа удуртукчуну таныштырып тура, демдеглээн.
Мооң мурнунда Тываның Баштыңының Администрациязында база Чазак Аппарадында информастыг айыыл чок чорук департаментизин удуртуп чораан Эдуард Ховалыг республиканың чурагайлыг хөгжүлде сайыдынга томуйлаткан. Профессионал ажыл албаны чурагай инфраструктуразын хөгжүдери база күрүне эрге-чагырга органнарында амгы үениң шиитпирлерин киирери-биле сырый харылзаалыг специалист регионнуң бо адырында айтырыгларны эки билир деп, Владислав Ховалыг демдеглээн.
«Бистиң республиканың чурттакчы бүрүзү эскерип каар боттуг үре-түңнелдерлиг идепкейжи чорууңарга, бедик арга-мергежилиңерге идегеп тур мен. Тываны амыдырап-чурттаарынга таарымчалыг амгы үениң, технология талазы-биле мурнакчы региону кылдыр тургузар ужурлуг бис» – деп, регионнуң Баштыңы чаа удуртукчуларга чагаан.
А. МОНГУШ.
Чингис СААЯНЫҢ тырттырган чуруктары.
“Шын” №4 2026 чылдың февраль 5
