КМД-ЭНЕРГО компания Кызыл кожууннуң девискээринде тудуг ажылдарынче кирген. Элегес-Аксы суурдан ырак эвесте белеткээн участокта тудугнуң тавааның өргеннерин быжыглап эгелээн. Чаа бүдүрүлгениң чаңгыс аай ханаларын эптээр.
— Чугаа дүрген тудуп үндүрер кылыглар дугайында. Ажыл хөй үе чарывас. График езугаар чоруп олурар бис – деп, КМД-ЭНЕРГО-нуң директору Алексей Абрамов тайылбырлаан.
Төлевилелдиң инвестору «Техмашсервис» компания бүдүрүлгеже 373 млн рубльди салган. Республика-биле ол компанияның аразында Тывага завод тудуунуң дугуржулгазы чардынган. Регионнуң Баштыңы Владислав Ховалыг мартта Красноярскының экономиктиг форумунга киржип чорааш, «Техмашсервистиң» чиңгине директору Игорь Тарабанов-биле дургужулгага атты салганнар.
«Бистиң ажылывыс херек кырында боттанып эгелээни ол. Заводка бүдүрер частыр бүдүмелдерни даг ажылдарынга, орук тудуунга ажыглаар. Бистиң тывыш бүдүрүлгелеривисти ол хандырар» – деп, Владислав Ховалыг социал четкилерде бижээн.
Завод чылда 5 муң тонна продукт бүдүрер күчүлүг деп, Тываның Экономиктиг сайзырал яамызы дыңнаткан. Ол хемчээлди ам-даа улгаттырар арга бар. Ынчангаш штатты ам-даа улгаттырар апаар. Баштайгы дээрезинде көрдүнген 27 ажылчынның орнунга, 40-ден-даа хөй кижи херек. Регионнуң чонну ажылга хаара тудар албаны-биле кадрлар шилилдезин кады чорударын чугаалашкан. Бо чылдың төнчүзүнде завод ажылдап эгелээр ужурлуг. Моолче эскпортту база көрүп турар.
«Республика «Техмашсервистен» инвестиция деткимчезин бир дугаар ап турар. Федералдыг бюджеттен бюджет чээлизин дуглаары-биле, заводту боттуң хөреңгизи-биле чырык четкизинче кожар бис. Чээли акшазын заводтуң суг хандырылга инфраструктуразынче база ынаар баар орук тудуунче угландырган. Амгы үеде орук белен. Бүдүрүлге ажылдап эгелээш, үндүрүглерин төлеп эгелээрге, бюджет чээлизин дуглаары көрдүнген» – деп, Тываның Баштыңы бодунуң блогунда бижээн.
ТР-ниң Чазааның парлалга албаны.