Тываның Баштыңы Владислав Ховалыг дүүн, сентябрь 22-де, Чадаана хоорайның үндезилеттинип тургустунганындан бээр 150 чыл, ол ышкаш Алдыы-Хүрээниң 150 чыл оюнуң байырлалының ажыдыышкынынга киришкен.
Улуг төөгүлүг болуушкуннар байырлалы-биле Владислав Ховалыг Чадаана хоорайның болгаш Чөөн-Хемчик кожууннуң чурттакчы чонунга Тыва Республиканың Чазааның өмүнээзинден, бодунуң мурнундан изиг байырны сеткилиниң ханызындан чедирип, бүгүдеге амыр-чаагай чорукту, ажыл-херектерге чедиишкиннерни күзеп, Тываның улуг кожууннарының бирээзи Чөөн-Хемчик болгаш ооң төвү Чадаана хоорай бурунгаар депшилгелиг хөгжүүрүн йөрээген.
Чөөн-Хемчик кожууннуң болгаш ооң төвү Чадаана хоорайның чурттакчыларының салгалдарының республиканың сайзыралынга киирген төөгүлүг улуг үлүү бүгү Тываның өндүр өнчүзү-дүр деп, ол демдеглээн. Тываның бурунгаар депшилгезинге бүдүрген үүле-херээ кончуг ужур-дузалыг болган, ат-сывы төөгүге артып калган, Даа кожуунну чагырып чораан Хайдып Үгер-Даа, Буян-Бадыргы нояннар, Россияның Маадыры Сергей Шойгу, тыва бижиктиң үндезилекчизи Моңгуш Лопсан-Чимит, эки турачы Вера Байлак дээш Чадаананың хөй санныг шылгараңгай кижилериниң күш-ажылга, эртем-билигге, тайбыңны камгалаар херекке киирген үлүг-хуузу амгы болгаш келир үениң салгалдарынга төлептиг үлегер-чижек болурун Владислав Ховалыг онзалап айыткан.
Чадаана хоорайның хөгжүлдезинге көскү үлүүн киирген кижилерге Тываның Баштыңының Өөрүп четтириишкин бижиктерин, Тыва Республиканың күрүне шаңналдарын болгаш өске-даа шаңнал-макталдарны байырлыг байдалга тывыскан. Шаңнаттырганнарның аразында Тываның Баштыңының Өөрүп четтириишкин бижии-биле шаңнаткан Лариса Дагба, Тываның Баштыңының Хүндүлел бижии-биле шаңнаткан Валентина Дамбырак дээш өскелер-даа бар.
Чадаана хоорайның 150 чыл ою байырлалдан белеткээн материалдарны “Шынның” дараазында үндүрүлгезинден номчуур силер.
Ш. МОҢГУШ.
Буян ООРЖАКТЫҢ тырттырган чуруктары
“Шын” №72 2023 чылдың сентябрь 23
