Февраль 14-те РФ-тиң Президентизи Владимир Путинниң Тывада бүзүреттирген төлээлеринге Тываның хамаатылары дараазында чагыгларны киирген.
Хөй-ниити хүлээп алыышкыннарынга чоннуң чагыгларын хүлээри уламчылап турар. РФ-тиң Президентизиниң соңгулдаларының кандидадынга чагыгларны чон киирип турар.
Февраль 14-те элээн каш кижи келгеш, чагыын киирген. Оларның кайызының-даа көдүрген айтырыглары хууда эвес, а ниитилелдиң чидиг айтырыглары болганын демдеглээли. Кадык камгалалынга, хоорай иштинге аргыжылгага, өөредилгеге хамааржыр чонну дүвүредип чоруур айтырыглар болган.
«Республиканың база бир чидиг айтырыгларының бирээзи – Россияның хөмүр-даш одаар регионнарында дег, кышкы хөө. Хирлиг агаар чүгле экологияга эвес, а кижилерге эң-не чугула – кадыкка кончуг хоралыг. Чоокта чаа Тываның бир эртемдени хөө чок ыш үнер тускай печканы чогаадып кылган. Ынчангаш амыдыралы чегей, хөй ажы-төлдүг, хоочуннарлыг, инвалидтерлиг дээн ышкаш чиигелделиг өг-бүлелерге шак ындыг печка кылдырар субсидия бээр аргаларны өөренип көөрүн диледим» – деп, волонтер Нелля Чыпсынак дилегни киирген.
Хөй-ниити айтырыгларының бирээзи «ковид» үезинде онлайн өөредилгени дуржулгага көрген болганывыста, республикавыска, ылаңгыя өске-даа Кыдыкы Соңгу чүк регионнарынга ындыг өөредилге эргежок чугула. Кыжын кончуг соок үелерде школачылар өөренмейн баар. Ынчангаш онлайн хевирге өөренириниң тускай программазын ажылдап кылырын Кызылдың садыг-саарылга техникумунуң башкызы Ирина Дамба дилээн.
РФ-тиң Президентизиниң соңгулдаларының кандидадынга чагыгларның бирээзи– кем-херек үүлгедиишкиннерин эвээжедири-биле участок шагдааларының санын көвүдедири болган.
Айдың ОНДАР.
“Шын” №12 2024 чылдың февраль 16
