Бөгүн, 2026 чылдың март 26-да Тываның Баштыңы, “Чаңгыс демниг Россия” партияның регионда салбырының секретары Владислав Ховалыг организастыг чөвүлел хуралды эрттирип, “Улусчу программа 2.0: чагыглардан – херек кырында ажылдарже” улуг хемчээлдиг төлевилелдиң эгелээнин чарлаан. Партияның баш бурунгаар соңгулдалар угланыышкынынга хемчеглер республиканың шупту кожууннарынга болгаш хоорайларынга эртер.
Чөвүлел хуралга Дээди Хуралдың даргазы Кан-оол Даваа, “Чаңгыс демниг Россия” партияның депутаттар корпузу, Партияның регионда күүседикчи комитединиң төлээлээри, Регионну башкарар төптүң болгаш массалыг информация чепсектериниң төлээлери киришкен.
Бөгүнгү төлевилел ээлчеглиг чүүл эвес, 5 чыл дургузунда боттандырып келген “Улусчу программаның” системниг ажылы-дыр деп, Владислав Ховалыг демдеглээн.
Тываның чурттакчыларындан 50 муң ажыг чагыглар кирген, ийиги чагыг бүрүзү өг-бүлелерден. Регионнуң планы 95 хуу күүсеттинген. Школаларны, уруглар садтарын, ФАП-тарны, клубтарны, оруктарны туткан дээш өске-даа ажылдарны херек кырында кылган. Ол бистиң күштүг талавыс деп, Тываның Баштыңы демдеглээн.
“Чуртталга чаңгыс черге турбас. ТШО-нуң киржикчилерин, оларның өг-бүлелерин деткиири, экономиканың, экологияның, айыыл чок чоруктуң айтырыглары дээш чаа сорулгалар тыптып келген. “Улусчу программа 2.0: чагыглардан – херек кырында ажылдарже” төлевилелче кижилерниң чагыгларын киирип, оларны күүседир ужурлуг бис” деп Владислав Ховалыг чугаалаан.
“Депутат, депутатка кандидат бүрүзү ужуражыышкыннарга киржип, төгерик столдарга кижилер-биле чугаалажыр. Бис кижилерниң үнүн дыңнаар ужурлуг бис” деп, “Чаңгыс демниг Россия” партияның регионда салбырының секретары Владислав Ховалыг чугаалаан.
Чөвүлел хуралдың киржикчилери төлевилелди сайгарып, чон-биле ужуражыышкыннарже үнүүшкүннерниң графиги-биле танышкан.
Бистиң корр.
Чиңгис СААЯНЫҢ тырттырган чуруктары.
