«Россеть Сибирьниӊ» энергетиктери хоойлуга чөрүштүр шөйүп аскан оптоволокнолуг кабельдерни дилеп турар.
Электри дамчыдар шугумнарда хоойлуга чөрүштүр азып турар кабельдерни дилээр дээш, «Россети Сибирь» тускайлаттынган кезектерни (подразделение) база сонуургалдыг ажылдакчыларны хаара туткан.
Телефон харылзаазыныӊ операторлары электри четкизиниӊ чагыларыныӊ ээлери-биле дугурушпайн, аренда керээзи чарып албайн, боттарыныӊ оптоволокнолуг кабельдерин шөйүп, он-он километр электри шугумнарын хоойлуга дүүшпес ёзу-биле ажыглап турар. Отповолокнолуг кабельдерни чөпшээрел чок азып каарга, четкиниӊ үзүк-соксаал чок ажылдаарынга айыыл тургустунуп, озал-ондак бооп болур, ооӊ түӊнелинде электри энергиязын, интернетти өжүрер апаар. Ынчангаш энергетиктер хоойлуга дүүшпес чорук-биле шөйүп аскан кабельдерниӊ бар-чогун хынаар ажылды күштелдирген.
«Хары угда ийи угланыышкын-биле ажылдап тур бис. Бирээде, электри дамчыдар шугумнарда хоойлуга чөрүштүр аскан оптоволокнолуг кабельдерни хынамчалыг дилеп, демдеглеп турар. Регионнарда тускай ажылдакчыларны немеп берген, олар ындыг хажыдыышкынны көргеш, керээ чок азып каан болза, акт тургузуп турар. Ийиде, шак ындыг чүүлдер тыпканы дээш штаттыӊ ажылдакчыларынга немей төлевир бээр» – деп, «Россети Сибирьниӊ» информациялыг технологиялар талазы-биле директору Олег Швецов тайылбырлаан.
Тургустунган актыны өөренип көргеш, харылзаа операторларынга хомудал киирип, хыналда органнарынче, судче билдириишкиннер чорудар. Прокуратураныӊ шиитпири-биле каш муӊ борбак рубль торгаал төледир, ындыг таварылгалар эвээш эвес, ол кабель азарын чөпшээредип алыры азы аренда төлеп турары-биле шуут дүүшпес болгулаар.
«Россеть Сибирьниӊ» дыӊнадып турары-биле алырга, кезек харылзаа операторлары уткуштур кээп, керээни чарып ап турар, ындыг турбуже, бо айтырыг массалыг болуп артпышаан.
Чижээ, Красноярск крайда «Ростелеком» оптоволокно кабельдерин 18 ажыг муӊ чагыда шөйүп, анаа керээ чокка ажыглап турар. «Дом.ру» хоойлуга чөрүштүр 6 муӊ ажыг чагыларны хөлезилеп турар. «Игра сервис» провайдер 2 муӊ хире чагыда кабельдерин шөйүп алган.
Омск облазында «Ростелеком» керээ чокка 6 муӊ чагыны, «Дом.ру» база 3,6 муӊ чагыны эжелеп алган.
Тыва Республикада хоойлуга чөрүштүр кабель азып турар 183 таварылганы бүрүткээн. Харылзаа операторлары база-ла чогуур керээ чарып албайн, 8 муӊ хире чагыларны эжелээн.
«Россети Сибирь Тываэнерго» АН-ныӊ энергетиктери регионда харылзаа операторлары-биле ужурашкан. Харылзаа шугумнарын төлевилелин тургузуп, ону тудуп кылырда, ажыглалга киирерде, хоойлу ёзугаар энергетика объектилеринге коштунар дээрзин тайылбырлап берген. «Тывахарылзааинформга» бодаарга, «Ростелеком» керээ чарып алырынга чөпшээрешкен. Шак ол харылзаа операторунга хомудал киирип, негелде тургузар ажылды чорудуп турар.
«Россеть Сибирьниӊ» техниктиг специалистери оптоволокно дээш эки туразы-биле чөпшээрел кылдырып алырынче кыйгырып турар. Харылзаа операторларын- га – провайдерлерге электри дамчыдар шугумну арендалап алырыныӊ өртээ энергия күчүзүнүӊ клазындан хамааржыр: 1 чагы дээш бир айда 30-ден 200 рубль чедир боор. Оон аӊгыда, провайдерлер кедилиг ажылдаары-биле, боттарыныӊ оптоволокно кабелин айтып бээр ужурлуг. Энергетика четкилерин септээр азы көжүрер апарганда, оптоволокнонуӊ ээзи-биле харылзашкаш, ону көжүрерин дугуржуп алыр. А хоойлуга дүүшпес ёзу-биле шөйүп каан оптоволокно кабелин ап кааптар.
Р. Демчик очулдурган.
“Шын” №89 2024 чылдың ноябрь 20
