Тыва Республиканың Чазааның доктаалы-биле бадылаан «Чакпыыл арага” деп профилактиктиг хемчеглер планының 9-ку пунктузун күүседири-биле Тыва Республиканың иштинге чамдык ажыл-чорудулганы лицензиялаар болгаш хайгаараар албан дараазында сан-медээни бараалгаткан.
Ук хемчеглер планының иштинге шагдаа ажылдакчыларынга деткимче көргүзүп, арга-дарыны хоойлу-дүрүмге чөрүштүр садып-саарарын кезе шавары база илередири-биле кады ажылдарны чоруткан. Полиция-биле кады республиканың иштинге 18 үнүүшкүннү чоруткан, ооң иштинде Кызыл хоорайга, солагай болгаш оң талакы эриктерниң дачаларынга, Вавилин ээтпээнге, Ак-Довурак хоорайга, Барыын-Хемчик, Чеди-Хөл, Таңды, Чөөн-Хемчик, Тожу, Улуг-Хем, Эрзин, Каа-Хем, Кызыл болгаш Бии-Хем кожууннарга. Чоруттунган ажылдарның түңнелинде, сайгарлыкчыларның болгаш организацияларның талазындан арага-дары кылыгларын хоойлу-дүрүмге чөрүштүр садып-сайгарар 26 хажыдыышкынны илередип, янзы-бүрү аттыг 3 014 кезек (3 105,8 л) араганы саарылгадан ужулган.
«Чакпыыл арага” деп профилактиктиг хемчеглерниң үезинде ук Албанның ажылдакчылары ЕГАИС системазын (арага-дарыны организация чежени садып алганын, ооң кайы хирези артканын хынап тодарадыр система) таварыштыр 27 негелдени шагдаа черлеринче чоруткан. Ол ышкаш арага-дары садып турар 76 садыгны хынаан, 85 тайылбырлыг чугааны садыгжылар болгаш сайгарлыкчылар-биле чоруткан.
Ак болгаш Шивилиг доскуул черлеринге хамаарыштыр алыр чүве болза, «Росспиртпромом» акционерлиг ниитилел 6 айның дургузунда 1559 шил чөпшээрел чок арага кылыгларын олап Тываже киир сөөртүп кел чорааш, хавырткан. Ооң кииргени 15 негелдеге дүүштүр артып калган 3208 кезек (3692,62 л) арга-дарыны «Росспиртпромом» АН-ниң ажылдакчылары үндүр сөөртүр болган.
2023 чылдың июнь 6-да Россияның регионнарынга чакпыыл арагадан калбак хоранналыышкыннарның таварылгалары-биле холбаштыр «Мистер Сидр» марканың эзиртир суксунун илередири-биле арага-дары рыногунга дарый шинчилелдерни чоруткан. Ооң бүдүрүкчүзү “Анди” АН ону Тываже чоргускан бе дээрзин ЕГАИС деп автоматчыткан системаны таварыштыр хынаан. Ол организацияда садып алыышкыннар талазы-биле сан-медээлер чок, ындыг барымдаа чажыт саарылданың дугайында херечилеп турар. Ооң-биле чергелештир Албанның ажылдакчылары регионнуң арага рыногунуң шинчилелин чоруткан. Ооң үезинде хоорайның садыгларының үлгүүргелериндан, РПС, Эхнатон, Обувь баазаларның баартыктарындан ук марканың суксунун илеретпээн.
Кызыл хоорайның улуг прокурорунуң удуртулгазы-биле Тыва Республиканың иштинге чамдык ажыл-чорудулганы лицензиялаар болгаш хайгаараар албан 2023 чылдың июнь 21-де Кызылдың баазазында сайгарлыкчы чорукту боттандырып турар кижиден шыгмажырга арттырып каан, ЕГАИС системазында бүрүткеттинмээн арага кылыгларын тыпкан. Ук медээни Тываның прокурорунга дыңнадып чедирген.
Тыва Республиканың ИХЯ-зының, Росхереглелхайгааралдың, Федералдыг Үндүрүг албанының болгаш Кызылдың мэриязы-биле катай ук Албан ниитиниң чемненилге черлеринге, садыгларга профилактика рейдилерин доктаамал чорудуп турар. Мооң мурнунда «Серебряный шар» садыглары арага-дары кылыгларын үүрмектеп садар адырга хажыдыышкыннары дээш 6 катап торгаалга онаажып, 462 000 рубль түңнүг административтиг хемчегге онаашкан. 2023 чылдың июнь 26-да ук садыгга профилактиктиг үнүүшкүннү чорударының дугайында шиитпирни үндүрген.
Солагай эриктиң дачалар ниитилелиниң 7 дугаар автобус доктаамында «Сай» садыгның ээзинге хамаарыштыр арага кылыгларын көрдүнген үе-шакты сагывайн садып турар дээш, администравтиг корум-чурум үрээшкининиң дугайында протоколу тургускан.
Ындыг ажылдар моон-даа соңгаар уламчылаар.
Арага-дары кылыгларының садыглаашкынында хажыдыышкыннар баарымдааларының дугайында 6-44-55 дугаарлыг телефонче долгаңар.
А. ХЕРТЕК белеткээн.
Чуруктарны интернеттен алган.
