Чалбыыш-биле демиселчилер

Чылдың-на апрель 30-де Россияда Өрт камгалалының хүнүн демдеглеп турар. Бо чылын ук албанның тургустунганындан бээр 372 чылы болур.

Өрт албаны хөлчок дүрген сайзыраңгайжып, шалыпкыны-биле сайзырап олурар албан. Ол болза амгы үениң техниказы-биле чепсегленген, ол ышкаш онза байдалдар чайладыр үүле-херекке бедик мергежилдиг профессионалдарны бодунда эвилелдеп, хаара туткан күчү-күштүг шалыпкын тургузуг болур.

Бөгүн чуртта өрт камгалалының 1500 ажыг гарнизону ажылдап турар. Ооң хүрээлеңинче 23 муң ажыг салбыр кирип турар. Оларда ажылдап турар кижилерниң саны 402 муң ажыг. Олар дээрге Россияның ОБЯ-ның федералдыг өртке удур албанының, субъектилерде, муниципалитеттерде, чагырга аайы-биле чер-черлерде албаннарның, ол ышкаш хууда өрт камгалалының ажылдакчылары-дыр. Ол ышкаш 55,2 муң хире эки тураның өртчүлери база бар. Оларның чепсеглелинде 66 муң ажыг техника турар.

Эрткен чылдың дургузунда 2,4 муң кижилиг 386 өрт салбыры тургустунган. Чүгле эрткен чылдың дургузунда өртчүлер 2 сая өрттү өжүрүп, камгалал ажылдарын чоруткан. 39 муң кижини камгалап алган, 158 муң хире кижини өскээр көжүрген.

Чүгле шынарлыг өөредилге белеткели эвес, а спорт база өртчүлерниң чедиишкинниг ажылының үндезини болур. Мага-бот күжү, авааңгыр – дүргени, шыдамыы өртчүнүң быжыг тура-соруун хевирлээриниң майыктары ол. Дыка хөй өрт кезектеринде өөредилгениң бедик суургалары бар, аңаа өртчүлер бодунуң билиг-мергежилин, арга-дуржулгазын быжыглап турарлар. Дайынчы ажыл үезинде оларның хереглеттине бээри чугаажок. Өрттерни өжүрериниң херээн улам ыңай сайзырадыры-биле 1937 чылдан бээр өрт-камгалал спортун тургускан. Россияның чыынды командазының төлээлери үргүлчү делегей чемпионнары, өрт-камгалал спортунуң талазы-биле маргылдааларның тиилекчилери болуп турарлар.

Күрүнениң өртке удур албанының ажылдакчылары чүгле чурт иштинде эвес, а даштыкы күрүнелерде база улуг хүндүткелдиг. Россий авиация Чилиге, Португалияга, Израильге, Арменияга болган бойдус өрттерин өжүреринге киржип чорааннар.

Өрт камгалалының хүнүнүң бүдүүзүнде Россия Федерациязының Президентизиниң Чарлыы-биле онза байдалдарны чайладыр херекке көргүскен эрес-дидим болгаш маадырлыг чоруу дээш, а ол ышкаш албан хаалдазынга бедик хууда көргүзүглери дээш РФ-тиң Онза байдалдар яамызының 233 ажылдакчызын күрүне шаңналдары-биле шаңнаан, 36 кижиге хүндүлүг аттарны тывыскан.

Ол ышкаш албан хаалдазының ажыл-чорудулгазынга бедик көргүзүглери дээш база Россияның Онза байдалдар яамызының күрүнениң Өртке удур албанының хөгжүлдезинге киирген үлүг-хуузу дээш яамының шылгарал демдектери-биле 2400 ажыг кижини шаңнаан.

/ А. ХЕРТЕК.
"Шын" №31 2023 чылдың апрель 29