Майның 30-де, Россияның Президентизи Владимир Путин улуг лейтенант Чалым Чүлдүм- оолга Россия Маадырының Сылдызын тывыскан. Россияның шылгараңгай хамаатыларынга эң дээди күрүне шаңналдарын тыпсыр байырлыг езулал Кремльдиң Екатерина залынга болуп эрткен.
Тываның Баштыңы Владислав Ховалыг бедик шаңналдар тыпсыр езулал соонда Маадырга байырын чедирген. «Эрткен чылдың декабрьда дайынчы тулчуушкун үезинде дайзынның автомобилин ол бир дугаарында эскерип каан. Дүрген болгаш шын шиитпирни үндүрүп, хыдыкчылар бөлүүн баштапкаш, дайзынның уунче шимчеп үнүпкен. Офицер эрес-дидим, коргуш чок хөделип, дайзынны узуткааш, дайынчы даалганы күүсеткен» — деп, республиканың удуртукчузу бодунуң блогунда бижээн.
Чалым Сюндюпович Чүлдүм-оол Өвүр кожууннуң Чаа-Суурга төрүттүнген. Академик М.Ф. Решетев аттыг Сибирьниң күрүнениң аэрокосмиктиг университедин дооскан. Төрээн кожуунунуң организацияларын, республиканың 1 дугаар эмнелгезинге ажылдап, амгы үеде Россияның армиязында албан-хүлээлгезин эрттирип турар. Дайынчы ачы-хавыяазы дээш «Эрес-дидим чоруу дээш» медаль, «Ада-чурттуң мурнунга ачы-хавыяазы дээш» орденниң II чергезиниң медалы-биле шаңнаткан.
А. МОНГУШ.
Чурукту интернет четкизинден алган.
«Шын» №40 2024 чылдың июнь 1
