Шыдыраага чедиишкиннер
Новосибирск областың Кольцово хоорайда Эртем төвүнге июнь 30-ден июль 6-га чедир “Сибирьниң угаанныглары” деп Бүгү-россия чергелиг фестивальга Ю.Л. Марковка тураскааткан чаңчыл болган девискээр маргылдаалары улуг көдүрлүүшкүннүг болуп эрткен. Аңаа Москва хоорайдан, Тыва, Бурят, Алтай республикалардан, Алтай крайдан, Томск, Иркутск, Кемерово, Омск, Магадан областарындан 240 элээди шыдыраачылар киришкен.
Фестивальдың кол сорулгазы — октябрь айда Новосибирскиге болур Сибирьниң түңнел оюннарынга база “Сибирьниң угаанныглары” деп Кубок маргылдааларынга киржир эргени чедип алыры.
Ол фестивальга Тыва Республиканың алдарлыг тренери Сергей Түлүштүң удуртулгазы-биле 3 шыдыраачы оолдар чедиишкинниг ойнап, эки түңнелдерни көргүскеннер. Джампел Санай 11 хар чедир база Тимур Иргит 13 харлыг оолдар аразынга 9 оюндан 6.5 санны ап, 3-кү чер дээш санаашкынга аштыргаш, 4-кү черлерни алганнар.
Дараазында июль 1–8 хүннеринде Благовещенск хоорайга 9-11-13 харлыг уруглар, оолдар аразынга Россия Кубогунга киржир эрге дээш, ол ышкаш Амур облазының бирги чери дээш шыдыраага ажык турнир болуп эрткен. Аңаа бистиң республикадан 1 уруг, 2 оол дүрген ойнаарынга, блицке база узун салыгга чедиишкинниг киришкеннер. Түңнелинде блицке (дүрген ойнаары) база узун салыгга 13 хар чедир уруглар аразынга Анада Донгак 1-ги черни ап, алдын медальга төлептиг болган. Ол ышкаш 15 харлыг оолдар аразынга Мөңгүн Сарыг-Лама 3-кү черни ээлеп, хүлер медальды алган. Командалар аразынга ажык оюнга Мөңгүн Сарыг-Лама биле Владимир Куулар 3-кү шаңналдыг черни алганнар.
Чалыы шыдыраачыларны Кызыл хоорайның немелде өөредилге төвүнүң тренер-башкызы Сергей Түлүш чедимчелиг белеткээнин демдегледивис.
Алексей ЧАМБАЛ-ООЛ, спорттуң хоочуну.
Чуруктарны авторнуң архивинден алган.
