«Сүт-Хөл шалбаа турда, Сүмбер-Уула тей турар шагда…» азы «Сүт-Хөл – мөгелерниң ыдык чурту» дээш-ле бадырар Сүт-Хөлдү алгап-мактаан ыры, шүлүктер, чогаалдар дыка хөй.
Сүт-Хөл кожууннуң Төлээлекчилер хуралының даргазы, ТР-ниң Чаан мөгези деп хүндүлүг аттың эдилекчизи Андрей Хертектиң медеглээни-биле алырга, кожуунга тыва хүрешти сайзырадыр дээш, ай санында бир суму шаңнал-макталын харыылап, хүрешти организастап эрттирер деп кожуун деңнелинде шиитпирни хүлээп алган. Кожууннуң мөгелеринге үзүүргедиг хүреш болзун, аныяк-өскенниң спортка, хүрешке сонуургалы ам-даа одунзун дээш ук хемчегни кожууннуң планынче киирген. Февраль айда Ишкин сумузу эрттирген болза, мартта Кызыл-Тайга, апрельде Кара-Чыраа сумузу дээш ээлчег езугаар долгандырыг тура дүшпес, чылды өттүр уламчылаар.
Ай санында кожуунга тыва хүреш маргылдаалары болурга, ук кожууннуң мөгелери улам көвүдээр, эң-не шилиндектери илерээр дээрзи билдингир. Сүт-Хөл мөгелер чурту деп чараш адын бадыткап турар-дыр.
/ А. ОНДАР.
"Шын" №31 2023 чылдың апрель 29
