Чартык чүс чыл кады чурттаан

Тыва Республиканыӊ хартыга мөгези, Каа-Хем кожууннуӊ хүндүлүг хамаатызы Владимир Кенден биле кадык камгалалыныӊ хоочуну Нина Кенденниӊ өг-бүле тудуп бадылашкан хүнүнден бээр 50 чыл болган оюн таварыштыр Кызыл хоорайныӊ ЗАГС албан чери байырлыг ёзулал эрттирген.
Улуг назылыглар хүнү болгаш алдын кудазыныӊ хүнү - ийи дакпыр байырлал. Республикада билдингир хоочун өг-бүлеге Россияныӊ Пенсия Фондузунуӊ Тывада салбыры байыр чедирген.
- Хүндүлүг, Владимир Сырат-оолович биле Нина Начыновна, силерни көргеш, өгленген хүнүнден бээр алдын шайлалгазын демдеглеп турар улус деп чугаалаары берге. Ам-даа аныяксыг болгаш эрес-шоваа чорууӊар магаданчыг-дыр. Бот-боттарын хүндүлежип, чылыы-биле сагыш човап билир быжыг ынакшыл силерниӊ өөӊерге моон-даа соӊгаар турумчуур болзун! – деп, ук албан чериниӊ удуртукчузунуӊ оралакчызы Урана Моӊгуш чугаалаан.
Владимир Сырат-оолович 1965 чылда кожуун төвүнде школа-интернатка 5 дугаар класска өөренип тургаш, Нина Начыновна-биле чарылбас өӊнүктер апарганын, оон 1972 чылда өг-бүле тудуп бадыланчып алганын чугаалаан. Олар беш уруун төлептиг кижилер кылдыр өстүрүп кижизиткен, он ийи уйнуктарлыг болган.
Чартык чүс чыл дургузунда эп-найыралдыг болгаш үлегерлиг болуп чурттап келген өг-бүле 2022 чылда база катап ЗАГС ажылдакчыларыныӊ баарынга даӊгыраан берип, алдын билзектерни солушкан. Хоочун өг-бүлениӊ байырлыг бадылгазыныӊ соонда, вальс аялгазыныӊ үделгези-биле иелээн танцылаан. Төрелдери, уруглары, уйнуктары байыр чедиргеннер.
Республиканыӊ Юстиция яамызыныӊ медээзи-биле Р.Демчик белеткээн.
Источник https://www.tuvaonline.ru/2022/10/11/v-tuve-v-den-poz..

#минюст