Чөөн-Хемчик кожууннуң Чыраа-Бажын сумузунда «Салгал» уруглар садынче ниитизи-биле 119 уруг барып турар. Чаштар он дөрт кижизидикчи башкының хайгааралында. Ол ышкаш улуг кижизидикчи башкы, үш тускай эртемниг ажылдакчы, эргелекчи ажылдап турар.
Уруглар садының эргелекчизи Чодураа Монгуш коллектив демниг болгаш ажылынга бердингенин онзалап демдеглеп турар. Ол ук школа назыны четпээн уругларның өөредилге албан черин он ажыг чылдар дургузунда билдилиг удуртуп, чонунуң хүндүткелин чаалап алган.
Оран-саваның ишти чырык, делгем, чылыг, арыг-силиг. Коронавирус хамчыынга удур тарылганы коллектив шупту салдырткан. Ол ышкаш эртенги дезинфекция дээш шупту санитарлыг негелделерни сагып турар. Бо хүнде курлавырда 12 тонна хөмүр бар. Октябрь айдан эгелеп график езугаар «кара алдынны» немей сөөртүп эгелээр. Ниитизи-биле одалга сезонунда 175 тонна хөмүр, 300 куб оттулар ыяш херек.
Ыры башкызы Уран Сонамның чугаазы-биле алырга, ук чаштар өргээзин «Чебурашка» уруглар сады-биле каттыштырган.
– 1954 чылда сумуга «Чебурашка» уруглар сады туттунган. 1980 чылда совхозка ийи каът «Салгал» уруглар садын малчыннарның ажы-төлүнге ажыткан турган. Амгы үеде чаштар өргээзиниң ийи оран-савазы 130 чаштарга көрдүнген. Ниитизи-биле чеди бөлүк бар. Кижизидикчи башкылар чаштарга амгы үениң негелдези-биле солун болгаш өөредиглиг кичээлдерни, угаан сайзырадыр оюннарны эрттирип турар. Олар кожуун, республика чергелиг аңгы-аңгы мөөрейлерге киржип, шаңнал-макталдыг черлерни чаалап ап турарлар. Ол ышкаш чылдың-на картофельди тарып, күзүн элбек дүжүттү ажаап алыр чаңчылдыг бис.
Ажылдакчыларның ниити саны – 52. Башкы бүрүзү чылда ийи катап билиин бедидип, өөренип ооренип чоруп турарлар. Хоочун кижизидикчи башкылар хүндүлүг дыштанылгада-даа болза, аныяктарга арга-сүмезин берип чоруурлар. Оларга ыры башкызы Уран Сонам, күш-культура башкызы Сырга Тагба-Доржу база кижизидикчи башкылар Долаана Монгуш, Уран Монгуш, Айлан Монгуш, Чойганмаа Кара-Монгуш хамааржыр. Ажылынга харыысаалгалыг дузалакчы хоочун башкы Анчымаа Куулар амгы үеге дээр ажылдап чоруур. Ол ышкаш үр уеде ажылдап чоруур эмчи Олчеймаа Сатты, профком даргазы Саида Сарыгларны, эрес-кежээ, дузааргак хоочуннар Шораана Монгушту, Уран Кууларны мактавас арга чок.
Коллективтиң он ажыг эр ажылдакчылары сумувустуң аңгы-аңгы спортчу хемчеглеринге шаңнал-макталдыг киржип, хөй-ниити ажылдарынче хаара туттунган. Олар губернатор төлевилелдериниң киржикчилеринге боттуг дузаны чедирип турарлар.
Келир чылын бистиң уруглар садынга үндезин септелгени болгаш эргижирээн оран-саваны чаартып бээринге бүзүреп турар бис – деп, ыры башкызы уруглар садының амыдыралын таныштырган.
Школа назыны четпээн уругларның өөредилге албан черлериниң ажылдакчылары болгаш кижизидикчи башкылары боттарының күжүн, билиин, ынакшылын болгаш буянныын чаштарга берип, оларга өөрүшкүнү болгаш аас-кежикти сөңнеп турар. «Салгал» чаштар өргээзиниң ажылдакчылары профессионал байырлалын таварыштыр республиканың уруглар садтарында ажылдап турар коллективтерге чедиишкиннерни болгаш ам-даа сайзыраарын күзеп турар.
