Янзы-бүрү өң-чүзүннүг, каас-чараш кылдыр даараан национал хептерлиг бичии чаштар Чаа-Хөл суурнуң Культура бажыңын өңгүр чараш кылдыр каастап, оларның хөглүг өткүт үннери чаңгыланып турган. Ол дээрге апрель 19-туң хүнүнде Чаа-Хөл кожууннуң уруглар садтарының бичии самчыларының аразынга “Улуг танцылар” деп мөөрей болуп турганы ол.
“Улуг танцылар” деп кожуун чергелиг мөөрейге уруглар садтарының самчылары, оларның ада-иелери болгаш башкылары шыңгыы белеткенген. Бичии оолдар, уругларның күүселдезинге тааржыр танцыларны Россияның улустарының танцыларының аразындан шилип алыры, оларны уругларга өөредири, танцы бүрүзүнүң күүседикчилериниң хевин даараары дээш ажыл хөй болган.
“Улуг танцылар” мөөрейниң кожуун чергелиг түңнел чадазынга Чаа-Хөл суурнуң “Солнышко”, “Чодураа”, Ак-Туруг суурнуң “Хүнчүгеш” садтың назы-хар аайы-биле бичии, ортумак болгаш улуг бөлүктер танцычыларының ниитизи-биле он бир бөлүү киришкен.
“Улуг танцыларже” оруун чаа-ла изеп үнүп турар-даа болза, танцыларны садиктер чаштарының күүседири бир янзы онзагай болганындан мөөрейниң киржикчилериниң аразындан эң дээре танцычыларны илередип үнелээри жюри кежигүннеринге дыка нарын болганы чугаажок.
Жюриниң кежигүннериниң шиитпири-биле “Улуг танцылар” мөөрейиниң бөлүктер аайы-биле тиилекчилерин тодараткан. Чижээлээрге, Чаа-Хөл суурнуң “Чодураа” уруглар садының самчылары Сендаюш Ондар биле Амелии Монгуш “Часкы вальс" деп танцыны эң чараштыр күүсеткеш, улуг бөлүктүң уругларының аразынга тиилекчи болганнар. Ак-Туруг суурнуң “Хүнчүгеш” уруглар садының самчылар бөлүү “Аас-кежиктиг чаш назын” деп бурят танцыны күүсеткеш, улуг бөлүктүң танцычыларының аразынга тиилекчи деп бедии-биле үнелеткеннер.
“Улуг танцылар” мөөрейиниң киржикчилериниң назы-хар аайы-биле бөлүктерге тиилекчилерни мактал бижиктер болгаш өртектиг белектер-биле шаңнаан.
Макталдар болгаш шаңналдар, харын-даа мырыңай аштырыышкыннар танцының улуг уран чүүлүнче оларның баштайгы базымнары, “Улуг танцылар” мөөрейниң киржикчилериниң аразындан келир үениң кайгамчыктыг самчылары үнер чадавас.
Чаа-Хөл суурнуң Культура бажыңы – улусчу уран чүүлдүң хайныышкынныг одаа. Каш хонук бурунгаар, апрель 15-те “Ойнаар-кыстар” мөөрейин эрттирген. Ойнаар-кыстар даараарынга хандыкшылдыг ус-шеверлер аңаа боттарының даараан ойнаар-кыстарын делгээн.
“Тыва – бистиң өргээвис” деп республика чергелиг фестиваль-мөөрейге кожууннуң уран чүүл ажылдакчылары, Тиилелге хүнү май 9-та Кызыл хоорайга болур ниити ырылар бөлүктериниң концертинге Чаа-Хөл кожууннуң херээжен ыраажыларының бөлүү амгы үеде Культура бажыңында белеткенип турар.
/ Шаңгыр-оол МОҢГУШ.
"Шын" №29 2023 чылдың апрель 22
