Хоорай хевирлиг Каа-Хем суурнуң «Чедиишкинниң девискээри» деп аттыг 3 дугаар школазының баазазында школа чанының лагери ажылдап турар. Аңаа Россияның чоннарының чаңгыс деминиң чылынга тураскааткан хемчег болган. Ону «Россияның эзиржигештериниң дем каттыжылгазы» деп темалыг профильдиг ээлчегниң иштинге организастаан. Ооң угланыышкыны — хөй нациялыг чуртувустуң культуразы болгаш ёзу-чаңчылдарынга уругларның сонуургалын оттурары.
Уругларга чаңчылчаан тыва национал оюннарны таныштырган. Ол оюннар киржикчилерни чүгле хөглеткен эвес, тыва чоннуң культуразын болгаш ёзу-чаңчылдарын билип алырынга дузалаан. Күш-культура башкызы оолдарга «Тевек» деп тыва оюннуң хевирлерин тайылбырлавышаан, мастер-классты эрттирген. Оолдарга күш-дамырын сайзырадырынга дыка ажыктыг болган.
Бирги классчы бичии мөгелерниң бараалгаткан тыва хүреш девии көрүкчүлерни магадаткан. Ол ышкаш уругларның Россияның чоннарынга тураскааткан уран чүүл күүселделери киржикчилер аразынга демниг болгаш найыралдыг байдалды тургускан.
Хемчег «Россияның эзиржигештериниң» флешмоб танцызы болгаш «Кызыл парустар» деп отряд ырының күүселдези-биле доозулган. Чайгы дыштанылга дугайында чырык сактыышкыннарны арттырар, салгалдарны каттыштырар бо ыры уругларның дыштанылга лагерьлериниң ыдык ыры апарган.
/ Бистиң корр.
Медээни болгаш чурукту ТР-ниң Өөредилге яамызының социал четкиде арнындан алган.
“Шын” №23 2026 чылдың июнь 18
"Шын" солуннуң МАХ-каналынга каттыжыңар: max.ru/join/egenQ...