Бичии оолдар хүрежи
Өвүр кожууннуң төвү Хандагайты суурга Тиилелгениң 80 чыл оюнга тураскааткан 8 хардан 18 хар чедир 5 бөлүкке бичии оолдар аразынга республика чергелиг тыва хүреш маргылдаазын кожууннуң удуртулгазы байырлыг байдалга эрттирген.
Маргылдааның түңнелинде 15–16 харлыг оолдар аразынга 1-ги черни Сүрүн Балдан (Эрзин), 2-ги черни Шоваа Янзоо (Тес-Хем), 3–4-кү черлерни Сүгдер Доңгак (Өвүр) база Намбар Куулар (Өвүр) алганнар. Дараазында 17–18 харлыг оолдар аразынга Эрзинден Максим Ооржак шүглүп үнген. Үжүүрлешкен мөге Тес-Хемден Аңчы Хонмит, 3–4-кү черлерни Айдаш Монгуш (Өвүр) база Дая Шиинчик (Тес-Хем) үлешкеннер. Шаңналдыг черлерже кирген мөгелер кубок, медаль, хүндүлел бижиктер, акша шаңналдарын алганнар.
Россияның бирги чери дээш маргылдаа
Осетияның (Аланияның) төвү Владикавказ хоорайга май 6–10 хүннеринде студентилер аразынга Россияның бирги чери дээш спортчу хүрештерге (грек-рим, херээжен, хостуг хүреш) маргылдаалар болуп эрткен.
Аңаа тыва студендилерден ТывКУ-нуң студентизи Альберт Тумат (тренери Мерген Ооржак) чедиишкинниг хүрешкеш, 61 килдиг мөгелер аразынга 2-ги шаңналдыг черге төлептиг болганы улуг өөрүшкү.
Ча адар хевиринге база тыва баг адар хевиринге маргылдаалар
Олимп аттыг олимпийжи курлавырлар спорт школазының бирги чери дээш 18 хар чедир оолдар, уруглар аразынга ча адарынга маргылдаа "Автомобилист" спорт залынга май 8-тиң хүнүнде болуп эрткен.
Маргылдаага Улуг-Хем, Таңды кожууннардан база Армияның Төп спортчу клуву – Тыва (ЦСКА-Тыва), Олимп аттыг олимпийжи курлавырлар спорт школазындан 33 шыырак ча адыгжылары киришкеннер. Дүрүм езугаар маргылдаа 30 метр хемчээлге болган. Түңнелинде, оолдар аразынга 1-ги база 3-кү черлерге Олимп аттыг ОКСШ-тан спортчулар Чүгдержеп Салчак биле Айдыс Дүлүш төлептиг болганнар. Ийи дугаар черни Улуг-Хем кожууннуң спорт школазындан Алихан Норбу алган. Кыс уруглар аразынга 1–2 дугаар черлерни Олимп аттыг ОКСШ-туң спортчулары Алина Охемчик биле Карина Монгуш үлешкеннер. Үшкү шаңналдыг черни АТСК-Тываның спортчузу Ольга Ондар алган. Шаңналдыг черлерже кирген спортчулар медальдар, дипломнар, байырлалдың өртектиг белектерин алганнар.
Дараазында Тос-Булакка республиканың бирги чери дээш тыва ча адар оюннуң “Баг адар хевиринге” командалар аразынга солун маргылдаа болуп эрткен. Ниитизи-биле 11 команда, 55 спортчу күжүн шенеп киришкеннер. Бо солун маргылдааны республиканың Спорт яамызының, Национал спорт сайзырадыр төвүнүң удуртулгазы эрттирген. Маргылдааның түңнелинде 1 дугаар черже Улуг-Хем кожууннуң Хайыракан суурдан команда шылгарап үнген. Улаштыр 2–3 дугаар черлерге Бай-Тайга база Сүт-Хөл кожууннуң командалары төлептиг болганнар. Тиилекчи командаларны "Хүреш" стадионунга хөй чон мурнунга шаңнап-мактаан.
Тергиин шыдыраачы
Чылдың “Тергиин шыдыраачызы” деп маргылдааның эрттирер дүрүмүн Республиканың шыдыраа чөвүлели элээн каш чадаларга чарганы улуг ужур-уткалыг болган.
Бир дугаарында, чаштар, элээдилер, шыырак база хоочун шыдыраачылар аразынга шыдырааның янзы-бүрү хевирлерин сайзырадыры, дараазында спорт мастерлерин белеткээри болур. Узун салыгның хевирин Тиилелгениң 80 чыл оюнга тураскаадып, май 7–11 хүннеринде, ТШО-нуң киржикчизи Экер-оол Манчынның сүмелээни-биле эрттирген.
Ниитизи-биле бир дугаар маргылдаага 59 эр база 15 херээжен шыдыраачы киришкеннер. Маргылдааның кол шииткекчизи Чечек Ховалыг база кол секретары Сергей Түлүштүң таныштырганы-биле ойнакчы бүрүзү 1 хүнде чүгле 2 катап ойнаар база 1 оюн 4 шак хире узун болур.
Маргылдааның түңнелинде шыдамыктарның шыдамыктары илерээн. Эр улус аразынга республиканың 3 дакпыр чемпиону Долаан Салчак 9 салыгдан 8 санны ап, 1-ги черни алган. База 2–3 дугаар черлерни тренер башкы Сергей Түлүштүң өөреникчилери, школачы оолдар Мөңгүн Сарыг-Лама биле Начын Чамзы үлешкеннер.
Херээжен улус аразынга 1-ги черни Россияның Кубогунуң 2 дакпыр тиилекчизи, Бразилияга 2024 чылда делегей чемпионадының киржикчизи Арина Иргит база 2–3 дугаар черлерни ТывКУ-нуң башкызы Айлаана Монгуш биле өөреникчи кыс Ананда Донгак үлешкеннер.
Хоочун шыдыраачылар аразынга 1 дугаар черни Олег Дамбиев, 2–3 дугаар черлерни Валерий Омун биле Мерген Анай-оол алганнар. Хоочуннар аразынга 86 харлыг Улуг-оол Кандан төнчүзүнге чедир эки ойнап, үлегерни көргүскен.
А. ЧАМБАЛ-ООЛ, спорттуң хоочуну.
Буян ООРЖАКТЫҢ тырттырган чуруктары.
«Шын» №18 2025 чылдың май 15
