Баскетбол
Август 14-17 хүннеринде Сүбедей аттыг спорт ордузунга Чазак даргазының шаңналы дээш баскетбол маргылдаазы болуп эрткен.
Аңаа республикада шыырак дээн 11 херээжен, 20 эр командалар күжүн шенежип киришкен. Солун оюннарның түңнелинде дараазында командалар шылгараан:
Эр ойнакчылар аразынга 1-ги черге “Одучу” команда төлептиг болган. Ийиги-үшкү черлерни “Идегел” биле “Белдир” командалар алганнар. Херээжен ойнакчылар аразынга 1-ги черге “Сүбедей” командазы төлептиг болган. Ийиги–үшкү черлерни ОБЯ (МЧС) биле “Ярыгин” командалары алганнар. Түңнелинде шаңнал кирген командалар кубок, медаль, диплом болгаш акша шаңналдарын алган.
Тергиин шыдыраачы
Республика хүнүнге тураскааткан чаңчыл болган “ Тергиин шыдыраачы” деп маргылдааның бирги чадазы август 13-17 хүннеринде Аныяктар ордузунга швейцар дүрүм-биле эр, херээжен шыырак ойнакчылар аразынга болган. Чидиг маргылдааның түңнелинде дараазында 8 шыдыраачылар ноябрь айда 2 дугаар шилилгелиг чадазынче киргеннер. Бирги черге 13 харлыг Мөңгүн Сарыг-Лама төлептиг болган. Ийи дугаар черни 18 харлыг Болат Бадыраа база 3 дугаар черни 35 харлыг шыдыраа тренери Долаан Салчак алганнар. 4-тен 8-ке чедир черлерни алган ойнакчылар: Херел Сандай-оол, Начын Чамзы, Алдар Ооржак, Арина Иргит, Анастасия Ооржак болур. База чурум ёзугаар келбээн ойнакчылар орнунга ойнаар 2 шыдыраачыны илереткен. Ындыг эргени Чөөн-Хемчиктен Ужар Монгуш биле Эрзинден Сайдаш Чигнит алганнар.
Ча адар оюннуң баг адар хевири
Август 14-те Тываның 5 чылы аттыг стадионунга оолдар, уруглар аразынга ча адар оюннуң баг адар хевиринге “Наадым – 2025” база Республика хүнүнге тураскааткан чаңчыл болган маргылдаазы солун байдалга болуп эрткен. Аңаа оолдар аразынга шаңналдыг черлерже дараазында спортчулар кирген: 1-ги черни Буян-Доржу Монгуш (Мөңгүн-Тайга), 2-ги черни Сайын-Белек Сенди (Улуг-Хем), 3-кү черни Шангыр Куулар (Таңды). Уруглар аразынга 1-ги черни Виктори Шувакпут (Чаа-Хөл), 2-ги черни Ай-кыс Дирти (Чаа-Хөл), 3-кү черни Даяна Дандар (Чөөн-Хемчик)алган. Тиилекчилер медаль, диплом, өртектиг белектер-биле шаңнатканнар.
Хүреш
Август 13-15 хүннеринде В.С. Биче-оол аттыг стадионга “Наадым-2025”, Тиилелгениң 80 чыл оюнга, Ада-чурт камгалакчыларының чылынга база Республика хүнүнге тураскааткан 800 ажыг бичии, аныяк база хоочун мөгелер аразынга төөгүлүг солун хүреш маргылдаалары болуп эрткилээн.
Эң бичии 2018-2019 чылдың 88 мөгениң хүрежинге 1-8 чедир шаңнал кирген мөгелер: 1-ги черни Саян Балчыт (Эрзин), 2-ги черни Отчугаш Донгак (Өвүр), 3-кү черлерни Найдан Удел-оол (Улуг-Хем) база Каң-Болат Кундан (Эрзин), 5-тен 8-ке чедир Оттук Тежик (Өвүр), Айсан Монгуш (Өвүр), Начын Борбаанды (Чөөн-Хемчик), Чоргаар Шалык (Тес-Хем).
2016-2017 чылда төрүттүнген оолдар хүрежинге: 1-ги черни Рамзан Монгуш (Өвүр), 2-ги черни Санга Сат (Сүт-Хөл), 3-кү черлерни Чаян Дагба (Кызыл кожуун) база Сүгдер Донгак (Сүт-Хөл), 5-тен 8-ке чедир Танаа-Херел Содунам (Бай-Тайга), Кайгал Маскыр (Чеди-Хөл), Доржу-Маадыр Тежик (Өвүр), Байыр Ондар (Кызыл кожуун) алган.
2014-2015 чылда төрүттүнген оолдар хүрежинге: 1-ги черни Ромеш Куулар (Чөөн-Хемчик), 2-ги черни Сыдым Араптан (Бай-Тайга) алган, 3-кү черлерде – Сайын-Белек Зотов (Чаа-Хөл) база Киш-Чалаа Ондар (Сүт-Хөл), 5-8 черлерже Алдын-Херел Дагба (Кызыл кожуун), Ачыты Домбу (Кызыл кожуун), Доржу Доңгак (Сүт-Хөл), Сайын-Белек Акыс-оол (Чаа-Хөл) киргеннер.
2012-2013 чылда төрүттүнген оолдар хүрежинге: 1-ги черни Арбай Сат (Сүт-Хөл), 2-ги черни Алдар Монгуш (Чөөн-Хемчик), 3-кү черлерде Долаан Чооду (Тес-Хем) база Очур-Сүрүн Ондар (Сүт-Хөл), 5-тен 8-ке чедир шаңналдыг черлерже Тамерлан Куулар (Чөөн-Хемчик), Батыр Монгуш (Өвүр), Аяс Чаймаа (Тес-Хем), Аюш Середар (Эрзин) киргеннер.
2010-2011 чылда төрүттүнген оолдар хүрежинге: 1-ги черни Найыр Куулар (Чөөн-Хемчик), 2-ги черни Жанчув Додук (Эрзин), 3-кү черлерде Начын Ондар (Чөөн-Хемчик) база Ай-Белек Хертек (Эрзин), 5-тен 8-ке чедир шаңналдыг черлерже Лопсан Монгуш (Сүт-Хөл), Күдер Куулар (Өвүр), Соруктуг Монгуш (Чөөн-Хемчик), Сыдым Ооржак (Сүт-Хөл) киргеннер.
Аныяктар аразынга “Наадым-2025”
Тулган тиилекчи дээш 18 хар чедир оолдар аразынга 148 мөгениң хүрежинге 1-ден 8-ке чедир шаңналче дараазында мөгелер кирген:
Субудай Насык-Доржу (Сүт-Хөл) 1-ги черни ээлээш, “Тулган тиилекчи” атка төлептиг болган. Ооң-биле үжүүрлешкен мөге Намзырай Монгуш (Чөөн-Хемчик) 2-ги черни, 3-кү черлерде Айдаш Сержикбей (Чөөн-Хемчик) база Чамыян Кара-Сал (Чөөн-Хемчик), 5-тен 8-ке чедир шаңналдыг черлерже Аюш Түлүш (Улуг-Хем), Аржаан Сандак (Эрзин), Айыс Сагды (Эрзин), Ноян Ак (Тожу) киргеннер.
Түңнелинде бичии оолдар, аныяктар, хоочуннар аразынга Наадым-2025-тиң тиилекчилери база шаңнал кирген мөгелер кубок, медаль, диплом, өртектиг белектерни алганнар.
Алексей ЧАМБАЛ-ООЛ, спорттуң хоочуну.
“Шын” №32 2025 чылдың август 21
