Бөгүн, май 8-те, Кызыл хоорайның Азия төвүнге чээрби чаа автобусту чолаачыларга хүлээткен байырлыг чыскаалы болган. Аңаа ТР-ниң Баштыңы Владислав Ховалыг, ТР-ниң орук-транспорт сайыды Шораан Чыргал-оол, «Туваавтотранс» КХН бүдүрүлге чериниң директору Айдың Күдерек болгаш чаа автобустарның чолаачылары келген.
Айдың Күдерек, «Туваавтотранс» КХН бүдүрүлге чериниң директору:
– Чаа келген автобустар ажылдап эгелээринге белен. Бүрүткээр ажылдар адакталып турар. Байырлалдар соонда халдып эгелээр боор бис. 82 олуттуг улуг автобустар-дыр. 33 олутка олурар, а 49-унга турар. 1 олут кадыы кызыгаарлыг хамаатыларга көрдүнген. Изигде халдырга таарымчалыг кондиционерлиг. Кондукторлар биле чолаачылар ам-даа херек. Ажылдаар күзелдиг улусту чалап тур бис. Кондукторларның шалыңы 40 муңдан, а чолаачыларның 58 муңдан өрү.
Олег Эренчин, чолаачы:
– Эрткен чылын бо организацияга ажылдап кирип алдым. Ооң мурнунда бодум хууда автобустуг тургаш база-ла чон аргыштырылгазынга ажылдап чордум. Ажылдаваан черим чок, каяа-даа ажылдаан мен. Мында республиканың кайы-даа булуңундан «Д» категориялыг чолаачыларны хаара тудуп, кончуг көдүрлүүшкүннүг ажылдап тур бис. Чаа келген автобустарның ишти делгем, кончуг эки-дир. Чаңгыс багай чүве болза, доктаамнарывыс арай таарымча чок, бичии болуп турар-дыр ийин. Чонувуска бараан болуп ажылдап чоруурувуска өөрүп тур бис.
ТР-ниң Баштыңы Владислав Товарищтайовичиге чоннуң аргыжылгазының айтырыын шиитпирлеп, деткип турарынга өөрүп четтиргенивисти илередир-дир бис.
Айдын ОНДАР.
Ада ТЮЛЮШТУҢ тырттырган чуруктары.
