Бии-Хемде Сыын-Тайганың Ортаа Көк-Бутка бир аңчы аңнап чораан. Даг ажылдыр кезек кара булут үнүп келгеш, чаъстай каапкаш, чеди өңнүг челээш тыртыпкан. Челээштиң бир ужу аңчының олурган чериниң баарында Караңгы-Оюк деп черниң көшкезинде кээп үскен. Ол черден онзагай чараш хевир сынныг, он сес адыр өл мыйыстыг сыын самнап үнүп келген. Шынап-ла, сыынның чараш деп чүвези хола-биле шуткуп каан-на чүве, мыйыстары алдынналдыр херелденип турар. Сыын аяң шөлче үнгеш, кезек долгандыр маңнагылаан соонда, бажын өрү алзы көдүргештиң, челээшти кырлап үнүпкен. Челээштиң ортузунда өңнү өрү сыын кырлап бар чорааш, көзүлбейн барган.
Аңчы ол сыынны көргеш, сыын-даа аңнавайн, аалынче чанып келген. Ол-ла хевээр ол аңчы сыынче боо углаваан.
(Сүт-Хөл чурттуг Маржымал Очурович Ондар Кызылга 1990 чылда бижиткен).
“Тыва улустуң бурун чугаалары” номдан алган.
