Тываның чурттакчылары боттарының бажыңнарының бирги каъдында азы ооң девискээринде кафелер болгаш барларны хаарын негээр эргелиг.
Республиканың Чазаа эрткен неделяда «Арага продукциязын үүрмектеп садарын күрүнеден таарыштырарының база арага продукциязын ажыглаарын кызыгаарлаарының дугайында» регионнуң хоойлузунче эдилгелерни киирген.
Ажыл-чорудулганың чамдык хевирлеринге чөпшээрел бээр база хайгаараар талазы-биле ТР-ниң албанның удуртукчузу Эртине Намдан апрельде Күрүне Думазының хүлээп алганы «кудар черлерниң» ажылын кызыгаарлаан федералдыг хоойлуну удуртулгага алганын тайылбырлаан. «Кудар черлерге» шилдиң аксын ажыткаш, араганы кудуп бээрге, ында тургускан столдарга азы “тура шанчарларга” ижип болур барлар, кафелер болгаш садыглар хамааржыр.
Рестораннардан аңгыда каът бажыңнарда азы оларның девискээринде садыг черлеринге ол хоруг хамааржырын албан чери тайылбырлаан. Орай дүнеге чедир ажылдаар «кудар черлер» арага садарының кызыгаарлаан шагын ажыы-биле үрээринден аңгыда дааш-шимээнниң, чогуш-содааның болгаш кем-херек үүлгедиишкиннериниң дөзү апарып, хамаатыларга дүвүренчиг байдалды тургузуп турар.
Тывада ындыг «кудар черлер» ийи-чаңгыс бар деп, албанның специалистери демдеглээн. Россияның улуг хоорайларында ындыг черлер нептереңгей. Ындыг болзажок республика элээр чорук дээш демисежип турар болганда, ындыг хоойлу херек. Тус черниң сайгарлыкчылары кафе азы садыгларны водка, суук арага база пиво, сидро, пуаре, медовуха дээш өске-даа "чиик" арагалар садар черлерже хуулдурбас ужурлуг.
ТР-ниң Чазааның парлалга албаны.
"Шын" №46 2024 чылдың июнь 22