Кызылда чаа спортчу клубтуң ажыдыышкыны болган. Байырлыг ажыдыышкынга Чазактың төлээлери, билдингир тренерлер, ат-сураглыг спортчулар болгаш спортка сонуургалдыг кижилер киришкен. Арзылаң аттыг чаа клуб спорттуң янзы-бүрү хевирлеринге өөредип, спортчуларның белеткенир төвү болур. Чаа залга 12 хардан өрү элээдилер арга-дуржулгалыг тренерниң удуртулгазы-биле спортка хандыкшып, күш-культура талазы-биле чогуур белеткелди алыр аргалыг болур. Ылаңгыя тыва национал хүреш нептереңгей регионга мындыг зал кончуг чугула.
«Уругларга күш-культура болгаш спорт-биле хандыкшыырынга дыка эки байдалды демнежип тургаш тургускан хууда сайгарлыкчы биле тренерниң эвилелин демдеглексеп тур мен. Бо эгелээшкин онза хүндүткелди болгаш төлептиг чорукту илередип турар» — деп, Тыва Республиканың Чазак Даргазының оралакчызының хүлээлгезин күүседип турар Айдыс Сынаа чугаалаан.
Хууда сайгарлыкчы Раджубек Хаджиматовтуң клуб тургузар дээн эгелээшкинин «Территория 17» деп хөй-ниити организациязы болгаш Тыва национал хүреш федерациязы деткээн. Олар клубтуң келир сайзыралынга идигни берип, спортчу херекселдерни база залдың дерилгезинге чугула херек чүүлдерни садып алырынга дузалажыр күзелин илереткеннер. Мындыг деткимче аныяктар ортузунга кадык амыдыралды болгаш спортту хөгжүдериниң чугулазын онзалап көргүзүп турар.
Спортчу клубтуң тургузукчузу, хууда сайгарлыкчы Раджубек Хаджиматов спортчу клуб тургузары ооң күзели турганын чугаалаан: “Оолдар кудумчуну эвес, а спорт залды шилип алырын күзээр-дир мен. Амыдыралдың берге байдалынга таварышкан уругларны маңаа көрүксээр-дир мен, күзели бар болза-ла, бис деткииринге белен бис. Келир үеде бистиң спортчуларывысты акша-хөреңги талазы-биле деткиирин база планнап турар бис».
Спортчу зал Калинин кудумчузунуң 11а дугаар бажыңында ажыттынган. Чаа спортчу клуб аныяк спортчуларга шынарлыг белеткелди эртип, кадыын быжыглап, республиканың төлептиг хамаатылары болур арганы бээр.
Бистиң корр.
“Шын” №25 2025 чылдың июль 3
Чемпионнарга чаа клуб
8 июля 2025
2