Моол күрүнеде тываларның аас чогаалы
Кижиге хамаарылгалыг тывызыктар
1. Көъп кижи хүрээледи,
Хүрең аъдым чыраалады. (Диш, дыл.)
2. Ак аъдым
балгаш чуурду. (Диш.)
3. а) Аптараа долу
Алдын, мөңгүн. (Сырга.)
б)Аптараа долу
Ак кажык. (Диш.)
4. Ак даштан кажаа туттум,
Шилги аъдымны бош салдым. (Диш, дыл.)
5. Калбак хөлдү долгандыр Гантык (1) кажаа тур.
(Аас, диш.)
6. Аптараа долу
Ак хураган кежи. (Диш.)
7. Мен көрейим.
Сен чугаала. (Карак, аас.)
8. Агуй иштинде
Алдын дагша. (Карак.)
Россияда тываларның аас чогаалы
Мактаныышкын дугайында үлегер домактар
Өскен мен дээш, хөөреве,
Өнчүлүг мен дээш, көгүве.
Артык тенек адын мактаар,
Болбас тенек бодун мактаар.
Хөй-биле хөлзеве,
Көгээржик-биле калбаңнава.
Бардам баък,
Шалдаң соок.
Улдуруктуң азыы чидиг,
Улуургактың аксы байбаң.
Дурту кыска,
Туразы улуг.
Күштүг мен дээш хөрээң чайба.
Адыыргактың аксы байбаң,
Аскымчының чырыы чарык.
Бодуңну богдага бодава,
Эжиңни эникке бодава.
Баштай ушкан эжин каттырбас.
folk.tuvancenter.ru//Тыва улустуң аас чогаалы – чоннуң сагыш-сеткил өнчүзү деп сайтыдан алган.
Чурукту база ол сайтыдан хоолгалаан.
«Шын» №34 2025 чылдың сентябрь 4