2025 чылдың август 14-те «Шын» солуннуң 31 дугаар үндүрүлгезинге үнген Россияның Журналистер эвилелиниң кежигүнү, Национал школа хөгжүдер институттуң корректору Айлаңмаа Даржааның «ШЫН» – тыва дылдың суртаалчызы» деп материалын улуг сонуургал-биле номчудум. Берге, нарын үеде кончуг аныяанда тыва дылдың суртаалчызы болуп ажылдап чорааны солун болган.
Ол үеде «Шынга» ажылдап турган корреспондентилерни, журналистерни билир, таныыр болдум. Мен ынчан «Шын» солунга чогаадып алган шүлүктеримни, бичии материалдарымны ийи-бирлеп чедиргилээр турган мен. Ынчан Айлаңмаа дуңмам-биле таныжып алган мен. Оон бээр мен бо дуңмамны шыырак корреспондент, очулдурукчу, корректор, журналист деп санап чоруур мен.
Бо чылын Красноярск хоорайның ном үндүрер черинге парлаткан «Ак-көк Сүт-Хөл уруу-ла мен» деп номумну ажылдап кылган кол редакторум бо Айлаңмаа дуңмам чүве. Номумну НШХИ-ниң корректору дыка-ла шынарлыг, бедик деңнелге үндүржүп бергенинге улуу-биле четтирип, черге чедир мөгейдим.
А.Д. Даржаа номнуң утказын тыва дылга шын тайылбырлап, литературлуг билиглерни берип, меңээ дыка-ла дузалашкан. Боду бүдүштүг арга-сүмелиг, баштак, чогаалчы, даараныр, алдын холдуг кыс.
ТЧЭ-ниң чогаалчыларының шүлүктерин очулдуруп дузалажып турган. III аныяк чогаалчылар фестивалынга А.Д. Даржааның очулдурган шүлүктери хөйү-биле Россияның Чогаалчылар эвилелинче киргени улуг чедиишкин.
Мен бөдүүн бижикчи кижи бо корректор башкыны күрүнениң бедик адынга төлептиг деп бодаар мен.
Раиса ХОВАЛЫГ,
ТР-ниң чогаалчылар эвилелиниң кежигүнү.
Чурукту интернеттен алган: yandex.ru/images/sea...
«Шын» №34 2025 чылды4 сентябрь 4