Улуг-Хемниң Хайыракан суурнуң чону кымның-даа албадалы чокка, ачы-дуза акциязын эгелээн.
“Бис кандыг-даа сезиг чок, удавас болур Хоочуннар хүнүнге уткуштур хемчеглерге белеткенип турувуста, сентябрь 21-де долу эвес мобилизация чарлаптарга, суурнуң чону чыглып, тускай шериг операциязында киржип турар база ам киржир дээш чоруп турар оолдарга бичии-даа болза дузавыс көргүзээлиңер дээш, шак мындыг ажылды эгелээн бис. Мында Хайыраканның херээженнер эвилели, “Хек-даваннар” аттыг хоочуннар эвилели болгаш Культура одааның ажылдакчылары чылыг чеңи-чоктар, балаклаваларны (башты болгаш арынны дуглаптар бөрт) даарап, суг өтпес уктарны аргып турар” –деп, культура ажылдакчылары чугаалаан.
Суурнуң хоочуну Эдита Иргек аът челинден сугга өтпес уктарны аргып турар: “Шак мындыг уктар чылыг-даа, шык тыртпас база. Хирлени бээрге, сугга суккаш, силгипкеш, ол-ла дораан кедип ап болур. Аът челиниң дүгүнче суг сиңмес болгаш ындыг”- деп, дүктү дытпышаан, ээрбишаан, удур аргып четтигип турар шевер дыңнаткан.
“Долу эвес мобилизация чарлаптарга, бистиң суурувустуң оолдарындан кым-даа чажам дивээн. Бир өг-бүледен ийи оглу, бир уйнуу безин ынаар чорупкан. Черле ынчаш, суурувус чону кончуг хувискаалчы улус. Чүге дээрге бистиң маадырывыс капитан Түлүш Кечил-оол Хайыракандан үнген болгай. Ынчангаш ооң салгакчылары, чаңгыс чер-чурттуувустуң адын сыкпас дээш, эрес-дидим чоруп турлар. А бистиң херээжен чоннуң талазындан бо-ла-дыр, оларга ак орукту күзээш, черниң черинге оолдарывыс түревезин дээш, чылыг хептер даарап, аргып турарывыс бо”- деп, Хайыраканның идепкейлиг хоочуннарының бирээзи, даараныкчы Елена Тюлюш чугаалады. Чеңи-чоктарны оолдарның смс-те бижип турар дилээ-биле карманнарын иштинде кылдыр даарап турарлар.
Ачы-дуза чедирилгезиниң идепкейжи киржикчилери кижи бүрүзү даанган ажылдыг. Хайыраканның херээженнер чөвүлелиниң даргазы Салбакай Сендир-оол шериг оолдарга чем сугарынга эптиг хаптарны даарап турар.
“Алдынай Көгел-ооловна быжарга, бис шупту даарап турар бис”- деп, Роза Уйнукай чардыгар чай безин чок чугаалаан.
Хайыраканның аргыыр, даараар херээжен чону чаңгыс черге мөөңнежип алгаш, дөрт хонук дургузунда 30 чеңи-чок, 30 бөрттү даарап алганнар. Ону бо удаада чоруп турар оолдарга дүрген чедирип бээр деп турар. Суурнуң идепкейжи эриг баарлыг херээжен чонунуң бо ажылы мооң-биле доозулбас дээрзи билдингир. Олар чүгле суурунуң оолдарынга эвес, а Тывадан чоруткан оолдарга база шыдаар шаа-биле дузалаар бис дээн.
“Ырак черде шериг хүлээлгезин күүседип турар болгаш долу эвес мобилизация-биле чоруп турар оолдарывыстың сагыш-сеткилинге-даа чиик болур кылдыр, ында-мында багай медээлер тарадырының орнунга, орус-тыва, өске сөөк деп ылгашпайн, демниг дузалажып, деткиилиңер деп чонну кыйгырар-дыр бис!”- деп, Хайыраканның Культура бажыңының директору чугаалаан.
К. Монгуш.
