Кырааны азы инвалид дээш камгаладылгалыг пенсияны ап, Соңгу чүкте болгаш аңаа деңнээн девискээрлерде чурттап, ажылдавайн турар пенсионерлер чурттап турар черинден Россияның кайы-бир девискээринге дыштанып барып, автотранспортка, суг транспортунга болгаш агаар ужар-чүүл транспортунга аай-дедир чораанының билеттер өртээнге чарыгдалдарын 2 чылда бир катап күрүнеден дугладып ап болур.
Ону дугладып алыры ийи аңгы хевирлиг: билеттерни тускай талоннар-биле баш бурунгаар садып алыры азы билеттерни боттары садып алгаш, дыштанылга соонда оларны чурттап турар черинде социал камгалал албан черлеринге дужаагаш, чарыгдалдарын дугладып алыры.
Билет өртээнге чарыгдалдарны дуглаары кызыгаарлаашкынныг — авиакомпанияларның самолёттарының эконом-класстарынга, доктаамал маршруттарга автобустарның, үшкү категорияның суг транспортунуң азы дөрткү болгаш бешки чергениң каюталарының билет өртектеринге акша чарыгдалдарын дуглап бээр. Бир эвес пенсионер бодунуң хууда автотранспорту-биле аян-чоруктап чораан болза, орукка чарыгдалдарны бензин садып алганын бадыткаан документилерни барымдаалап дуглап бээр.
Үстүнде айыткан социал чиигелдени алыр эргелиг, Россияның өске девискээрлеринге дыштанып чорааш, билеттер өртээнге үндүрген чарыгдалдарын Тывада чурттап турар 2 429 пенсионер 2024 чылда дугладып алган. Аңаа ниитизи-биле 50,7 сая рубльди күрүне чарыгдаан.
Хамааты чурттап турар чериниң аайы-биле Россияның социал фондузунуң Тыва Республика салбырының клиентилер албанындан азы Күрүне ачы-дузазы (Госуслуги) порталда хууда кабинеди дамчыштыр билдириишкин кииргеш, билеттер өртээнге чарыгдалдарны дуглап алырын бадыткаан документилерни кошкан билдириишкинни почта дамчыштыр чоруткаш, билеттер өртээнге чарыгдалдарын дугладып ап болур.
Россияның социал фондузунуң ТР-де салбырының ажык медээлеринден.
Чурукту интернет четкизинден хоолгалаан.
«Шын» №9 2025 чылдың март 13