Май 5-те «Сүбедей» спорт өргээзинге шимчевес өнчүнүң чиигелделиг ипотеказының талазы-биле ярмарка ажылдап эгелээн. Ол бодунуң ажылын май 6-да дооскан. Аңаа чурттаар оран-саваның тудуун чорудуп турар 10 тудуг организациязының стендилерин бараалгаткан.
Хамаатылар чүгле ажыктыг сүме алырындан аңгыда, бир дөрбелчин метр чуртталга шөлүнүң өртээ чежел, бир бажыңда каш квартира барыл, туттунуп турар районнарның инфраструктуразы кандыг болурул дээрзин билип алганнар.
Чижек кылдыр алырга, «Спутник» чуртталга комплекизи бараалгадып турары бодунуң квартираларының планнаашкынының 3D хевирин көргүскен. Ол ышкаш ярмаркага Кызыл хоорайның «3-4 квартал» микрорайоннуң улуг үлегер-майыын бараалгаткан. Тудугжу организациялар: «СЗ Спутник», «Өлчей», «Кызылтудуг» КХН-нер. Бо районга бажың-балгат садып алыр күзелдиг кижилер планнаашкынны база инфраструктураны үнелээр аргалыг болганнар. Үлегер-майыкка дүүштүр алырга, маңаа 280 оруннуг уруглар садын, 1100 олуттуг школаны, 1242 дөрбелчин метр шөлдүг садыг төвүн болгаш спорт залын тудары көрдүнүп турар.
“Бир эвес чылда 16 хуу хире бөдүүн ипотеканың ай санында төлээр төлевилелин санап кээр чүве болза, 90 хире муң рубль үнүп келир. Кокшулга аарышкылыг түң. Ынчалзажок, чиигелделиг ипотека программазы-биле ай санының төлевири 30 хире муң рубль болур. Ылгал каракка-ла көскү, ынчангаш республиканың Чазаа бөгүн ук программа Тываның чуртакчы бүрүзүнге чедингир болзун дээш кызып ажылдап турар» — деп, Тыва Республиканың тудуг сайыдының хүлээлгезин күүседип турар Артыш Кыргыс демдеглээн.
Чиигелделиг ипотеканы чөпшээрээринге кол негелде: чээлиниң хуусаазы 20 чылдан эвээжевес, чээлиниң хемчээли — 6 сая рубльден эвээш эвес, баштайгы дадывыры 15 хуудан кудулавас болур ужурлуг.
А.ХЕРТЕК белеткээн.
«Шын» №34 2024 чылдың май 8
