Чылда 2 хуулуг чиигелделиг “тыва” ипотекага хереглел канчаар-даа аажок улуг. Тыва Республиканың Дээди Хуралының (парламентизиниң) депутаттарының мурнунга республика Чазааның 2023 чылда ажыл-чорудулгазының түңнелдериниң дугайында илеткелинде Тываның Баштыңы чиигелделиг ипотека программазының чылда планы ажыр күүсеттинген дээрзин айыткан.
Программаның ажылдап эгелээнинден бээр эрткен чылдың каш-ла айларының дургузунда планда көрдүнген 801 ипотека чээлизиниң орнунга, Тываның чурттакчылары 2023 чылда 1010 чээлини долдурган.
Амгы үеде берген 1700 чээлиден аңгыда, банкылар, ооң иштинде «Сбербанк», «Росбанк», а ол ышкаш «Банк ДОМ.РФ», «Россельхозбанк» болгаш «Совкомбанк», ам безин 5 муң ажыг чээлилерге чөпшээрелин берген. Чылда 2 хуулуг чээлини алырынга чагыгларны 11 муң ажыг кижи киирген. Чиигелделиг ипотека программазынга хереглелди ооң ай санында төлевириниң ниити-федералдыг программалардан 2–2,5 катап чавыс болуп турары-биле тайылбырлап болур. Чиигелделиг ипотека Тываның өг-бүлелеринге чуртталга байдалын экижидер арга-шинектен аңгыда, республиканың чуртталга тудуунга идигни берген. Чаа тудуг-суурлар херии базымнар-биле шапкынчаан.
2023 чылда Тываның төөгүзүнде туруп көрбээн көргүзүглер чедип алдынган — 172,4 муң дөрбелчин метр чуртталга шөлү туттунган. Деңнелге кылдыр алырга, мооң мурнунда чылдарда Тывага эргижирээн бажыңнардан хамаатыларны көжүрериниң база өскүс уругларга бажың тударының программалары-биле оран-савалар туттунуп турган.
Чуртталга рыногунда 11 тудуг организациязындан чаа тудуглар талазы-биле саналдар бар, олар 4335 квартираның төлевилел угуулгазын чарлап аскан. Оларның 1298 квартиразы садып-саарылгада, 528 квартирага садыглаашкын ам-даа чоруттунмаан. Тываның Тудуг яамызының дыңнадып турары-биле алырга, база бир тудугжу организациязы 190 квартирага төлевилел угуулгазын чарлаар деп турар. Бөгүн Тываның Чазаа бадылаттынган ук программаның хуусаазын узадырының талазы-биле ажылдап турар. Ындыг болзажок, программаның мооң мурнунда бадылаттынган хуусаазы — 2024 чылдың июнь 30-де доостур дээрзин сагындырып каалы.
А. ХЕРТЕК белеткээн.
«Шын» №34 2024 чылдың май 8
