Экии, хүндүлүг редакция!
“Шын” солунну ачамның аайы-биле 1965 чылдан бээр школага 3-кү класска өөренип тургаш сонуургап номчуур чораан мен. Ачам ол шагда солуннарын, сеткүүлдерин көктеп, шидип шыгжап чораан.
Ол үеде бир “Шын” солунга үнген чарлал номчаанымны утпаан мен. 3-кү класстың чолаачылар өөредир 6 ай хуусаалыг курс школазын чарлап каан болган. “Мен үш класс кижи-дир мен, чолаачыга өөренийн” — деп ону ачамга чугааладым.
Школамны дооскаш, чолаачы мергежилди чедип алдым. Ынчалдыр “Шын” солун мени чолаачы болур күзелимни оттурган. Ам бежен чылдың нүүрүнде машинаны башкарып, төрээн Тывамның сайзыралынга үлүүм киирип, дугуй кырында амыдырап-чурттап чор мен.
1978 чылда “Шын” солунга бир-ле дугаар сактыышкын материал бижээн мен. Түңнелинде 7 рубль (гонорар) шаңнал акшаны-даа алган ийик мен.
Оон бээр-ле хостуг үелеримде бодумнуң чогааткан он ажыг шүлүктерим “Шын” солунга үнген чүве. Ылаңгыя кызыгааржы чораан сактыышкынымны аныяк-өскенге төрээн чуртунга ынак болурун “Шын” солунга патриотчу темаларга бижип чор мен.
Ынчангаш 100 харлаан “Шын” солунувустуң могаг-шылаг чок бүгү ажылдакчыларынга, бижикчилеринге, номчукчуларынга ажыл-ижинге чогаадыкчы чаа-чаа чедиишкиннерни күзедим! "Шын" солунувус ам-даа чүс-чүс чылдар иштинде хөй санныг номчукчуларга бараан болурун сеткилим ханызындан йөрээдим.
Курай! Курай! Курай!
Юрий ХОВАЛЫГ, ТР-ниң күш-культуразының болгаш спорттуң тергиини.
Сүт-Хөл кожуун, Бора-Тайга суур.
“Шын” №35 2005 чылдың сентябрь 11