Бо хүннерде Москваның Бүгү-россияның декоративтиг уран чүүл музейинде Тываның даш чонукчуларының чонар-даштан биче хемчээлдиг кылган ховар ажылдарының делгелгези болуп турар. Сентябрь 19-та эгелээн ховар делгелге октябрь 26-га чедир уламчылаар.
Ында музейниң фондузундан 200 ажыг делгээн чонар-даштан ажылдар шаг-төөгүден бээр Тыва чоннуң көшкүн амыдыралының үезинде тыптып келген ховар уран чүүлүнүң төөгүзүн “чугаалап турар”. Ол ышкаш делгелгени сонуургап келген улус даштан сиилбип кылган ажылдардан тываларның философиязы болгаш культурлуг үнелелдериниң дугайында билип ап болур. База бир сонуурганчыг чүүл – Россияның чурумалдыг уран чүүлүнүң алдын фондузунче кирген Тываның даш чонар мастерлериниң долу коллекциязын аалчыларга бир дугаар делгеп көргүскен.
Ук делгелгеде чонар-даштан кылыглардан аңгыда, музейниң фондузундан 1930–1970 чылдарда эртем-шинчилел институдунуң чурулга үлетпүрүнүң архив материалдары болгаш чуруктарын, амгы үениң даш чонукчулары, Тыва Республиканың Чурукчулар, Даш чонукчулары эвилелдериниң кежигүннери мастерлерниң ажылдарын база делгээн.
Экспозицияны тема аайы-биле аңгылаан: Бии-Хем биле Каа-Хемниң элезинниг барыын талазындан бедик тайгаларлыг чөөн кожууннарынга чедир. База бир кезээн шажын-чүдүлге болгаш культураның салдарынга тураскаадып аңгылаан.
Делгелгениң кол "маадыры" – чонар-даш. Мастерлерниң кол ажыглаар материалының онзагайын, ооң чүгле Тываның девискээринде бар болганын, өң-чүзүнүнүң талазы-биле байлак болганын делгелгениң аалчылары билип ап турар.
Москвада делгелгени Тыва Республиканың Даш чонукчуларының байырлалынга болгаш Тываның Чурукчулар эвилелиниң тургустунганындан бээр 60 чыл оюнга тураскаадып эрттирип турар.
Бистиң корр.
Чурукту интернет четкизинден алган.
“Шын” №37 2025 чылдың сентябрь 25