Кызылдың чурттакчылары болгаш Тываның найысылалының аалчылары Чоннуң чаңгыс деминиң хүнүн Арат шөлүнге байырлап демдеглээннер. Чаңчыл болу берген бо байырлал чоннарның найыралын болгаш хүндүткелдиң база шыдамык чоруктуң чугулазын чугаалажырынга эптиг арганы берип турар. Тываның Баштыңы Владислав Ховалыг байырлалга киришкен.
Республиканың Баштыңы Россияның күчү-күжү ооң хөй националдыг чоннарының чаңгыс эп-сеткилинде дээрзин демдеглээн. Российжилерниң ёзулуг чаңгыс деми берге үелерде иштики чөрүлдээлерни ажып эртеринге үндезин болуп, Төрээн чурттуң камгалалын хандырып турарын ол демдеглээн. «Россияның чоннарының бот-тускайлаңын болгаш дылдарын камныг кадагалап, хөй талалыывыска чоргаарланып чоруур бис. Каш янзы-даа болза чаңгыс демниивис бисти күштүг болгаш тиилеттирбес кылып турар. Чүгле кады, эгин кожа кандыг-даа бергелерни болгаш шылгалдаларны ажып эрте бээр бис. Бистиң ниити сорулгавыс – күчүлүг Россияның болгаш биче төрээн чуртувус Тыва Республиканың чечектелиишкини» – деп, ол чугаалаан.
Тываның Баштыңы чаңгыс чер чурттугларынга быжыг кадыкшылды, чедиишкиннерни, өг-бүлелерге тайбыңны болгаш эп-найыралды күзээн. «Чоннуң чаңгыс деминиң хүнү Төрээн черивиске өөрүшкүнү болгаш чоргааралды эккелзин!» — деп, Владислав Ховалыг түңнээн.
Тускай шериг операциязының хоочуну, «Тываның маадырлары» деп программаның киржикчизи Эртине Кара-Сал база байыр чедирген. Тускай шериг операциязы чурттуң шупту регионнарында чурттап чоруур аңгы-аңгы культуралыг, дылдарлыг, ёзу-чаңчылдарлыг дайынчыларны каттыштырганын ол демдеглээн.
Арат шөлүнге байырлыг хемчеглерге каш чүс кижи киришкен. Программада республиканың ат-сураглыг артистери болгаш чогаадыкчы бөлүктериниң концерти, улусчу чогаадылга ярмарказы, өрегелерниң делгелгези болуп эрткен. ТШО үезинде маадырлыы-биле мөчээн дайынчыларның иелер комитеди «СВОи» фото-чуруктар делгелгезин делгээн. Тываның Баштыңы Владислав Ховалыг байырлалдың шупту кол черлерин эргип көрген.
«Төрээн чурт камгалакчы- зы – ындыг мергежил бар» деп фото-делгелгени Президент грантызы-биле организастаан. Аңаа Төрээн чуртун камгалаарынга амы-тынын берген маадырларның чуруктарын делгээн. Делгелге чуртувустуң амыр-тайбыңы, хосталгазы, хүндүткели дээш амы-тынын берген кижилерни сактып чорууру чугула дээрзин сагындырып турар деп, организакчылар демдеглээн.
И.Г. Сафьянов аттыг орус культура төвүнүң организастааны орус кухня фестивалында орус борщ биле блиннерни аалчылар амзаан. Оон аңгыда узбек диаспораның төлээлери кызылчыларга болгаш аалчыларга бүдүн шой паш пловту белеткээн.
Арат шөлүнге консультация шөлдерин база ажылдаткан. Күзелдиг кижилер оон Россияның социал фондузунуң специалистеринге айтырыгларны салып, чер болгаш өнчү-хөреңги айтырыгларынга, чуртталга-коммунал ачы-дузаларга хамаарыштыр консультацияларны, халас юридиктиг дузаны ап, кадыкшыл булуңнарынга кадыын хынаткан.
Тываның Националдар херектериниң талазы-биле агентилели Экономиктиг сайзырал яамызы болгаш тус чер чагыргалары-биле кады Чоннуң чаңгыс дем хүнүнүң хемчеглерин организастаан. Россияның шупту регионнарының чаңгыс демниин көргүзери болгаш ону кижи бүрүзүнге угаадыр – байырлалдың кол сорулгазы.
ТР-ниң парлалга албанының медээзи болгаш чуруу.
“Шын” №43 2025 чылдың ноябрь 6