Эрзин кожууннуң Мөрен сумузунда дыка-ла ажылгыр-кежээ оглувус бар. Ооң ады Аким Сараагай. Ол кандыг-даа ажылды кылыр, бир көөрге, бажыңнарның хоолайларын-даа аштап-арыглап турар боор, холу черле куруг олурбас, бир-ле ажыл кылган турар. Боду хууда пилорама база ажыдып алган, чаңгыс чер чурттугларынга манзаларны дилдирип берип турар. Суурнуң чамдык кудумчуларында, ылаңгыя Оваа-Даш кудумчузунуң бажыңнарының херимнери чаарттынган, көөрге чаражын. Аким Кыргысович бажыңында дузалал ажыл-агыйлыг, инектер база тудуп турар.
Ооң ачазы Откун Сараагай база ус-шевер, ол суурнуң стадионун кылган тудугжуларның бирээзи. Аким ачазын дөзээн, бодунуң бажыңын улгаттыр дыка чараш кылдыр тудуп алган.
Аким Кыргысовичиниң өөнүң ишти Сайсу Романовна уруглар садында кижизидикчи башкы. Бо ээлдек-эвилең аныяк башкы чоокта чаа, январь айда, кожуун чергелиг «Чылдың башкызы» мөөрейге киришкеш, кижизидикчи башкылар аразынга «Тергиин тыва дыл болгаш чогаал башкызы-2026» деп номинацияның тиилекчизи болган.
Аким, Сайсуу Сараагайлар 4 ажы-төлүнүң үлегерлиг ада-иези. Чаңгыс оглун, үш кызын эртем-билигге сундулуг, ажылгыр-кежээ кылдыр кижизидип өстүрүп турарлар.
Ынчангаш бо эрес-кежээ, аныяк өг-бүлени Мөрен сумузунуң төлептиг өг-бүлези деп демдеглексээр-дир мен.
/ Чечекмаа САДИ, ТР-ниң алдарлыг ажылдакчызы.
Эрзин кожуун.
Чуруктарны Сараагайларның өг-бүле архивинден алган.
“Шын” №8 2026 чылдың март 5
