Тускай шериг операциязында киржип турар чаңгыс чер чурттугларывыска гуманитарлыг дуза чедирер ажылдар уламчылавышаан. Улусчу фронтунуң регионда салбыры Тываның Чазаа-биле кады ук ажылды ТШО эгелээнден бээр организастап турар.
Регионнуң чурттакчы чону болгаш аңгы-аңгы албан черлери дайынчы хөделиишкиннер девискээринге херек ужурлуг чүүлдерни Улусчу фронтунуң Кызыл хоорайда штавында чыып эккеп турар.
«Тыва Республиканың Кадык камгалал яамызының даалгазы база регионнуң чеди эмнелгезиниң каттышкан күжү-биле тускай шериг операциязында эмчи кезээниң чагыын езугаар баштайгы дуза кадарынга херек эмнерни болгаш дериг-херекселдерни чыгган. Даалга кээрге-ле, дораан чыып эгелээш, 5–6 хүннүң дургузунда чорудар чүъктү белеткеп эккелгенивис бо. Чагыг езугаар даңзыда бар-ла эмнерни чыгдывыс» – деп, ТР-ниң бюджет хандырылгалыг Ресфармация күрүне албан чериниң директору Чойгана Докпер-оол чугаалады.
Улусчу фронтунуң ТР-де удуртукчузу Саима Далчин «Озун» КХН-ниң чиңгине директору Чойгана Дыртык-оолга ТШО-же удаа-дараа «Аржаан» деп ижер арыг сугну чорудуп турары дээш өөрүп четтириишкинниң бижиин тывысты. Дайын шөлүнде ижер суг айтырыы нарын болганы-биле ында турар шериглерге ижер суг тынар агаар дег херек дээрзин сагындыраал.
Ол ышкаш Республиканың 1 дугаар эмнелгезиниң коллективи бо удаада акша чыггаш, «Мавик-3Про» деп 3 квадрокоптерни болгаш эмнерни садып эккелген. Олар ниитизи-биле 600 муң ажыг рубльди чыгган дээрзин Республиканың 1 дугаар эмнелгезиниң хирургия талазы-биле оралакчызы Болат Ховалыг медегледи.
«Тускай шериг операциязында дайынчыларывыска үш дугаар мотоциклди «Чаңгыс демниг Россия» партиязының фракциязының өмүнээзинден хүлээдип келдивис. Мотоциклден аңгыда, дроннар, генераторлар, автомашина, автомашинаның артык кезектери дээш өске-даа чүүлдерни удаа-дараа чорудуп турар бис. Ооң мурнунда мотоциклди 55-ки гвардейжи мото-адыгжы (даг) бригадазынга чоруткан болза, бо удаада 74-кү бригадада ажылдап турар чаңгыс чер чурттугларывыстың чагыы-биле чорудуп турарывыс бо» – деп, ТР-ниң Дээди Хуралының депутады Эрес Сат чугаалады.
«Бо чүък-биле 3 мотоциклди чорудар деп турар-дыр. Бирээзин бистиң командиривис садып алган. Ийи дугаарын Абакан хоорайның чурттакчылары, үш дугаар мотоциклди Тожунуң Доора-Хем, Тес-Хемниң Ак-Эрик сумуларының чурттакчылары болгаш Кызыл хоорайның сайгарлыкчыларының чыгган акшазы-биле саткан. Чаңгыс чер чурттугларывыска бисти деткип, акша-төгерикти чыып берип турары дээш өөрүп четтиргенивисти илередир-дир бис. Дайын шөлүнге дайынчы хүлээлгелер күүседиринге, аргыжарынга, бот-боттарывыска херек чүүлдер аай-дедир дажыырынга мотоцикл дыка херек. Ылаңгыя ам чорудар мотоциклдер дагга халдыр кылдыр кылган тускай техника-дыр» – деп, ТШО-нуң киржикчизи кыйгы ады Кеша тайылбырлады.
Айдың ОНДАР.
Ада ТЮЛЮШТУҢ тырттырган чуруктары.
«Шын» №79 2024 чылдың октябрь 16
