Чунар-бажыңнар чок…

Чоокку чылдарда кода-хоорай, суурларда чаа школалар, эмнелгелер, спорт, культура черлери, чуртталга бажыңнары туттунуп турары өөрүнчүг.

Одалга системазы-даа экижип, кышты чылыг эртип тур бис. Бок төгер черлер-даа чурумчаан. Ээзи чок ыттар-ла харын көвей хевээр.

Чоокку үелерге чедир суур бүрүзүнге чунар-бажыңнар ажылдап турду, ам кожууннар төптеринде безин чок. Чижээлээрге, Сарыг-Септиң чурттакчылары Кызылга кээп чунар-бажыңнаар, идик-хевин барбалап алгаш, база-ла маңаа эккеп чуур-дур. Чоокта чаа Каа-Хем суурда чунар-бажың ажыттынганын телевизорга көргүстү. Ооң чижээн ап, хоорай-суурларывыс чунар-бажыңнар тудуп эгелээр боор.

Арыг-силиг, кадык амыдырал дээш бо айтырыгны даргалар, эмчилер, хөй-ниитижилер көдүрүп, чон-биле ажылдаары чугула. Аарыг-аржык-даа оон хамааржыр. Чүдүлгевис-даа ишти-даштын арыгланырын сагындырып турар болгай.

Татьяна КЫЗЫЛ-ООЛ, хоочун эмчи.
Кызыл хоорай.

“Шын” №13 2024 чылдың февраль 21