Тываның Баштыңы Владислав Ховалыгның республиканың чурттакчыларынга эрттирген дорт эфири 2 шак чыгыы уламчылаан.
Бо чылын дамчыдылганы бир дугаар В. Ховалыгның ВКонтакте социал четкиде хуу арынынга, ол ышкаш «ОТР» телеканалга чергелештир эрттирген. Дорт дамчыдылга болур мурнунда республиканың Баштыңынга аңгы-аңгы каналдар дамчыштыр чурттакчы чондан 370 ажыг айтырыг келген. Айтырыгларның хөй кезии дорт эфир үезинде-ле кээп турган. Ол айтырыгларга чогуур яамылар, ведомстволар база тус чер эрге-чагыргаларының удуртукчулары шудургу харыылап турган.
Регионну удуртур төптүң (ЦУР) специалистери чурттакчы чондан келген айтырыгларны чыып, ажылдап кылгаш, блоктарга бөлүктээн. Владислав Ховалыг эң-не чидиг болгаш эң-не хөй салыр айтырыгларга харыылаан. Бо чылын чурттакчы чонну эң-не дүвүредип турар чидиг айтырыгларга: тудуглар болгаш оруктар, көвүрүглер септелгези, чурттаар оран-сава тудуу болгаш девискээрлер чаагайжыдылгазы болган.
В. Ховалыг айтырыгларга харыылап тура, регионнуң суурлары кедизинде барып канчаар хөгжүүр дугайында, күрүне программалары болгаш халас чер участоктарын бээриниң дугайында эгелекчи саналды боттандырары кандыг рольду ойнаарын чугаалаан. Президент В. Путинниң Тывага ажыл-агый аайы-биле кээп чораанының түңнелинде, тургускан даалгаларының даңзызынга тодаргай доктааган. Регионнуң эрге-чагыргазы ол шиитпирлерни кыска хуусаа дургузунда хевирлеп тургузарынга күжениишкинниг ажылды чоруткан түңнелинде, октябрь 9-та документиге ат салдынган. Тыва Арат Республиканың ССРЭ-ниң составынга эки тура-биле каттышканының 80 чылдаан оюн байырлап турар үеде Президентиниң деткимчези республиканың чурттакчыларынга кол болуушкун болгаш езулуг белек болган.
Дорт эфир үезинде регионнуң удуртукчузу Кызыл хоорайның чурттакчыларының Баянкольская кудумчузунда бажыңынга чурттаары айыылдыг апарган дугайында айтырыынга харыыны берген. Оларның чурттап турар бажыңы эргижирээн болгаш, аварийлиг бажыңнардан чурттакчыларны көжүрер программаже киргенин ол дыңнаткан. Доора-хемчилер суурунуң чиңгине планын бадылаар болгаш дугуржурунга бергедежип турарын дыңнаткан. Владислав Ховалыг план езугаар Россияның арга-арыг ажыл-агыйының удуртукчузу-биле ужурашканының соонда, түңнел харыыны бээрин аазаан.
Ол ышкаш Тываның Баштыңы республикага чиигелделиг тыва ипотека программазы моон соңгаар канчаар ажылдаарын тайылбырлаан. Вавилин ээтпээниң чурттакчыларын электри энергиязы-биле хандырар дугайында айтырыгның шиитпири тыпты бергенин база дыңнаткан. Тускай шериг операция зоназынче ажыл-агыйжы сургакчылаашкынче чораанын, шериглерге деткимче дугайында база өскүс уругларны чурттаар оран-сава-биле хандырарының темпизин дүргедедириниң дугайында чугаалаан. Президентиниң шиитпири-биле 2030 чылга чедир узаткан чаа ИПСЭР программазының иштинде республикада кандыг төлевилелдер боттанып турарын тайылбырлаан.
Владислав Ховалыг дорт эфир соонда шакты кызыгаарлааны-биле чурттакчылардан кирген 500 хире айтырыгларның чүгле эвээш кезиинге харыы бээр аргалыг болганын бодунуң блогунга хараадап бижээн. «Аңгы-аңгы яамыларның болгаш ведомстволарның специалистеринге бистиң чаңгыс чер чурттугларывыстан келген айтырыгларга дүрген харыылап турганы дээш четтирдим. Арткан шупту айтырыгларга дараазында хүннерде албан харыы бээрин бадыткап тур мен» — деп, республиканың Баштыңы демдеглээш, шак-ла ындыг форматка чугааны дараазында база уламчылаар дээрзин аазаан.
Дорт эфирниң бүрүн бижидилгезин Тываның Баштыңы Владислав Ховалыгның арынында https://vk.com/vladislavkhovalyg?w=wall360104045_69696айтыгдан кандыг-даа үеде көрүп болур.
Республиканың Баштыңы-биле дорт эфир анаада ышкаш эвес, бо удаада элээн амы-хуу айтырыгларлыг болган. Эгелээрде, республиканың Баштыңының хүн чуруму кандыгыл дээн айтырыг-биле эгелээш, төнчүзүнде «Республика Баштыңы болурга берге-дир бе?» деп айтырыг-биле төнген. Аңаа Владислав Ховалыг мынчаар харыылаан: «Ол дээрге харыысалга-дыр. Дааскан ажыл-херекке харыысалгалыг болур ужурлуг бис. Бир эвес чон кижиге бүзүрээш, ону соңгуп алган болза, ол бүзүрелди шынзыдар дээш, шырбаяр апаар".
Алдынай СОЯН белеткээн.
Буян ООРЖАКТЫҢ тырттырган чуруктары.
“Шын” №80 2024 чылдың октябрь 19
