2025 чылдың бирги чартыында Тыва Республикада чиигелделиг ипотека боттандырылгазы-биле чуртталга тудуу 2,3 катап өскен, регион өзүлде темпизи-биле чуртта бирги черже үнген. Регионнуң Тудуг яамызының дыңнатканы-биле алырга, август 25-ке чедир Тывада 789 өг-бүле чиигелделиг чуртталга чээлизиниң программазында киришкен. Президент Владимир Путинниң деткимчези-биле ол программа «Өг-бүле» национал төлевилел-биле боттанып, ажы-төлдүг өг-бүлелерге чиигелделиг негелделерни ажыглап, хууда чурттаар оран-сава садып алырын деткип турар.
2024 чылдың сентябрьда Тываның Баштыңы Владислав Ховалыг Владимир Путинге саналды киирген соонда, ол программа бо чазын катап ажылдап эгелээн.
Тыва Республиканың чурттакчыларынга катап эгелээн 2 хуу чиигелделиг ипотека программазынче 6 хар четпээн уруглуг, 18 хар четпээн ийи азы оон хөй ажы-төлдүг өг-бүлелер, ол ышкаш инвалид уруг азырап турар өг-бүлелер билдириишкинни киирип болур.
Бо чылдың марттан бээр республиканың чурттакчыларындан 4336 билдириишкин банкыларже кирген, ооң 2138-и эрте берген. Ук программада "Россельхозбанк" АН, "Банк ДОМ.РФ" АН, Ажаалга банкызы ПАН чээли организациялары киржип турарын сагындыраал. Эң хөй ипотека чээлилерин Ажаалга банкызы берген.
Аккредитациялыг 13 тудуг черлери белен болгаш туттунуп турар бажыңнар дугайында дыңнаткан. «Спутник» чуртталга комплекизиниң төлевилелин боттандырган «Спутник» тускай тудуг чери төлевилелдиң бирги чадазы– хөй аалдыг үш бажыңны тудуп дооскан. Компанияның дыңнатканы болза, 115 өг-бүле чиигелделиг ипотека программазынга тудуг үлүүн киирип, чаа бажыңнарның ээлери апарган.
«Төлевилелге бүзүрел болгаш деткимче дээш тудуг үлүүнүң шупту киржикчилеринге сеткиливис ханызындан четтиргенивисти илереттивис. Эрткен чылын 115 хөй аал чурттаар беш каът үш бажыңны тудар бирги чаданы эгелээн бис. Шупту квартираларның шеверлел ажылдарын кылып¸ иштики эжиктерин салып, чунуп-арыгланыр черлерин эптээн. Чаа бажың ээлеринге белек кылдыр херген дээвиирлерни база шынары эки эжиктерни салдывыс» – деп, «Спутник» тускай тудуг чери» КХН-ниң коммерция директору Ай-Хаан Догур-оол чугаалаан.
Август 6-да 40 өг-бүле «Спутник» чуртталга комплекизинде чаа квартираларның дүлгүүрлерин алган. Тудуг чери чаа бажыңнар ээлеринге байырлал концертин организастаан.
Чаа тудуглардан чурттаар оран-сава садып алырынга азы аккредитациялыг тудугжулар-биле бажың тудуунга ипотека акша-хөреңгизин ажыглап болур. 2026 чылдың төнчүзүнге чедир республика хөй аалдыг 153 бажыңны дужаап, 5 муң ажыг квартираны ажыглалче киирери планнаттынган деп, Тываның Тудуг яамызы дыңнаткан.
Тываның Тудуг яамызы чурттакчы чонга эптиг кылдыр Кызылда «Мээң бизнезим» төпте консультация пунктузун ажыткан, күзелдиг улус тудугжулардан үлүглүг тудугга хамаарышкан айтырыгларынга тайылбырны ап болур.
Тыва Республикага чиигелделиг өг-бүле ипотеказының программа негелдези-биле бо чылдың төнчүзүнге чедир 1000 керээ чарар норма доктааттынганын ведомство сагындырган.
Бистиң корр.
Чурукту интернеттен хоолгалаан.
2025 чылдың август 28 “Шын” №33