В. Халилов аттыг күрүне филармониязынга «Чылдың башкызы» деп башкыларның профессионал мергежил мөөрейиниң регионалдыг чадазының байырлыг ажыдыышкыны болуп эрткен. Аңаа Тываның янзы-бүрү булуңнарындан 4000 ажыг башкы чыглып келген. Ол дээрге республиканың башкыларының 40 хуузу. Киржикчилер саны – 175 башкы. Оларның коллегалары деткикчи бөлүү кылдыр кады найысылалга чыглып келгеннер.
«2023 чылда мөөрей онза ужур-уткалыг эртер. Башкының база дагдыныкчының, Чоннуң чаңгыс аай эп-сеткил чылында болгаш Россияның башкы эртеминиң үндезилекчизи Константин Ушинскийниң төрүттүнгенинден бээр 200 чыл оюнга тураскаадып турар. Ынчангаш бо чылын ук байырлал биске уттундурбас кылдыр артып каар. Бо байырлалды чүгле силер, башкы мергежилиниң тергииннери, боттандырар силер» - деп, Өөредилге сайыдының хүлээлгезин күүседип турар Елена Хардикова демдеглээн.
Киржикчилер апрель 3-тен 7-ге чедир мөөрейге боттарының профессионал мергежилин шылгаар. Тергииннерниң тергииннери республиканың өмүнээзинден Россияның мөөрейинге киржир эргени чаалап алырлар.
Апрель 3-7 - «ТР-ниң Чылдың башкызы - 2023». Мөөрейниң бирги чадазын «Башкы – профессионал» деп номинация ажыткан. Программада мөөрейниң шылгалдалары - «Кичээл», мастер-класстар болгаш оон-даа өске хемчеглер бар.
Апрель 4-6 хүннеринде «Чылдың аныяк башкызы – 2023» номинациязы болур.
Апрель 3-7 - «Чылдың кижизидикчи башкызы - 2023». Мөөрейге школа назыны четпээн өөредилге албан черлериниң башкылары киржир. Киржикчилерниң жеребевказы болган, оон «Мээң башкы олчам» («Моя педагогическая находка») деп мөөрей шылгалдалары уламчылаар.
Апрель 3-7 - «ТР-ниң Чылдың мастери - 2023». Мөөрейни «Мен – мастер мен» чадазы ажыткан. Улаштыр программа езугаар «өөредилге кичээлдери» болур. А мөөрейни «Тускай эртемге ынакшыыры» деп шылгалда доозар.
Апрель 3-7 – «Бүгү-россияның тыва дыл, орус дыл-биле катай, төрээн дыл башкыларының мастер-клазы». Мөөрей тыва дыл болгаш орус дыл башкыларын, муниципалдыг чаданың тиилекчилерин хаара тудар.
Апрель 3-6 – «Кижини кижизидери – 2023»
Апрель 3-5 – «Чылдың директору – 2023».
Апрель 4-6 – «Чылдың психолог башкызы – 2023».
Апрель 3-6 – «ТР-ниң тергиин эр башкызы – лидер болгаш дагдыныкчы - 2023».
