«Кадыкшыл» национал төлевилелдиң ачызында Тес-Хем кожууннуң Чыргалаңды сумузунда, чоннуң үрде манааны, чаа ФАП тудуу эгелээн. Чыргалаңдыда 90 ажыг чыл ажылдаан фельдшер-акушер пунктузунуң оран-савазы эргижирээн, ынчангаш чаа ФАП тудары чугула апарган. Бо хүнде (июнь 27-ниң көргүзүү-биле) тудуг объектизи 45 хуу туттунган, ханаларын бускаш, эптеп монтажтаар ажылдар чоруп турар.
Чаа ФАП эрги эмнелгениң кожазында кудумчуда туттунуп эгелээн. Тудугнуң ажыл-чорудулгазын Тес-Хем кожууннуң чагыргазының архитектору Көжер-Сылдыс Санчат хайгааралга алган.
Кожуун төвү Самагалдайдан 3 километр черде Чыргалаңды суурга бо чүүл — онзагай болуушкун. Чүге дизе тус черниң чурттакчылары чаа ФАП-ты шагда манаан. Ам оларның күзели бүткен — каш-ла хонук дургузунда чаа оран-саваның ханалары туттунган.
Чыргаланды сумузунда 900 хире кижи чурттап турар. Чаа ФАП чүгле чыргаландыжыларга улуг белек болур эвес, а республиканың Кадык камгалал яамызының, Тес-Хем кожуун чагыргазының, кожууннуң төп эмнелгезиниң база Тываның Чазааның кызымакай ажылы-дыр.
«Дуңмаларым база бодум эрги ФАП-ка төрүттүнген бис. Эмнелгевис эргижирээн-даа болза, эмчи дузазын үезинде ап турдувус. Бистиң бичии сумувуска амгы үениң чаа ФАП тудуу чурттакчы чонга улуг өөрүшкү-дүр. Моон соңгаар чылыг, чырыг, таарымчалыг байдалга оон-даа эки, шынарлыг эмчи дузазын ап эгелээр бис» — деп, көдээ ажыл-агыйның хоочуну Чечена Бадарчы чугаалаан.
Чаа туттунуп турар эмнелге албан черин «Кадык камгалалы» национал төлевилелдиң иштинде «Баштайгы медицина звенозунуң чаартылгалары» деп программа-биле боттандырып турар.
Бистиң корр.