Россия Федерациязының дээди өөредилге черлеринге өөредилге болгаш өөренип дооскан студентилерге хамаарыштыр хоойлу төлевилелдери Күрүне Думазынче киргениниң дугайында медээлер массалыг информация чепсектеринде көстүп келген.
Дээди өөредилге черлеринче шылгалдаларны дужаап кирериниң дүрүмнеринде өскерилгелер 2025 чылдың март 1-ден күштүг апаар чадавас. Эртемнер аайы-биле кирериниң шылгалдаларын РФ-тиң Өөредилге яамызының тургусканы даңзыдан боттары шилип алырын дээди өөредилге черлеринге чөпшээрээн. Орус дылга шылгалда кайы-даа өөредилге черлеринге эң-не баштайгы шылгалда болур ужурлуг. Бир эвес орус дылга шылгалдага билии чогуур деңнелде эвес болза, абитуриентини дараазында шылгалдаже киирбейн барып болур. Бо негелде национал регионнардан абитуриентилерге шыңгыы шаптараазын апарып болур деп эксперттерниң чамдыызы тайылбырлап турар.
Өөредилге черлеринче тускай сорулгалыг чагыг ёзугаар өөренип кирер абитуриентилер немелде 15 баллды, профессионал ориентация хемчеглеринге чедиишкиннери дээш чедип ап болур.
Бир эвес дээди өөредилге черлери өртектиг өөредилге олуттарының санын боттары, студентилерниң ниити санын барымдаалап, тодарадып ап болур турган болза, 2025 чылдан өртектиг өөредилге олуттарының санын баш бурунгаар айтыр ужурлуг.
Дээди өөредилге черлеринче кирериниң шылгалдаларын чедиишкинниг дужааган абитуриентилерниң даңзызын көргүзер тускай курлавырны РФ-тиң Өөредилге яамызы амгы үеде ажылдап кылып турар. Ол курлавырны “Күрүне ачы-дузазы” порталынга киирер. Кайы дээди өөредилге черлеринче өөренип киреринге чөпшээрелин абитуриент бо портал дамчыштыр чорудуп болур.
Бюджет акша-хөреңгизи-биле дээди өөредилге черлерин болгаш колледжтерни халас өөренип дооскан студентилерге негелдени шыңгыыраткан хоойлу төлевилелин Күрүне Думазынче киирген. Ол хоойлу төлевилелин хүлээп аптар болза, халас өөренип дооскан студент 1 чыл дургузунда ыяап-ла ажылдап кирер, дээди өөредилге черинге шиңгээдип алган эртем-билии ёзугаар албан 3 чыл (колледжтерниң доозукчулары – 2 чыл) ажылдаар ужурлуг. Бир эвес ажылдавас болза, ооң өөредилге черин өөренип доосканынга үндүрген күрүнениң чарыгдалдарын бюджетче 2 катап хөй хемчээлдиг эгидер хүлээлгелиг.
Өөредилге черлерин дооскан студентилер боттарының эртем-билии-биле ажылдап турарын Күрүнениң чаңгыс аай информация системазы дамчыштыр хайгаараар.
Российжи информация чепсектериниң ажык медээлеринден.
Чурукту интернет четкизинден хоолгалаан.
“Шын” №5 2025 чылдың февраль 13