2024 чылдың июнь 10-да Кызыл хоорайның девискээринде «Дорожное колесо фортуны» деп акция эгелей берген дээрзин парлалга конференциязынга ИХЯ-ның төлээлери дыңнаткан.
ИХЯ-ның Тыва Республика талазы-биле КАИ-ниң даргазының хүлээлгезин күүседип турар, полицияның полковниги Андрей Мельников болгаш «ПРОдвижение БЕЗопасности» Бүгү-российжи социал кампанияның Кызыл хоорайда бүрүн эргелиг төлээзи Татьяна Асканян акция дугайында тайылбырны берген. «Дорожное колесо фортуны» акцияның кол сорулгазы – транспорт башкарып чорааш, эмин эрттир дүрген халдып, чогуур дүрүмнерни сагываска-ла, орук озал-ондаандан чайлавас дээрзин сагындырары.
Акцияның утказы болза, күзелдиг чолаачы бүрүзү келгеш, АЗС-те быжыглаттынган викторинага киржип болур. Аңаа киржип тура, орукка транспорт башкарып чорааш, канчаар алдынарының дугайында чаа чүүлдерни киржикчи бүрүзү билип алыр. Амдыызында «дугуйлар» азы викторина Кызылдың ийи бензин кудар черинде, «Эне-Сайда» болгаш «Белдирде» быжыглаттынган. Удавас бензин кудар база бир төпке акцияның бир викториназы немежир.
Ооң соонда, Андрей Мельников беш ай дургузунда республика девискээринге, орук шимчээшкининиң дүрүмнерин сагываан чолаачыларның хайы-биле, 61 орук озал-ондаа болган дээрзин демдеглээн. Эрткен чыл-биле деңнээрге, орук озал-ондактары 20 хуу өзе берген. 3 хамааты когараан. Машина башкарып чорааш, эмин эрттир дүрген халыткан чолаачыларны кудумчуларда чагыларда быжыглаттынган видео-хайгааралдарның дузазы-биле тудуп турар. Хажыдыышкын кылып турар хамаатыларның саны сөөлгү беш ай дургузунда 60 000 чеде берген. Бо талазы-биле эрткен чылга деңнээрге, хажыдыышкыннар 80 хуу көвүдээн.
Корреспондентилерниң сонуургаан айтырыгларынга харыылап ора, орук озал-ондаа болурга, дарый дузалаарын чолаачылар-биле профилактиктиг ажылдарны удаа-дараа организастап турарын полковник Андрей Мельников сагындырган.
Чамдык хамаатылар орук шимчээшкинин хажыткаш, торгаал төлээш-даа, черле кезевес, катап база ол-ла частырыын катаптаар дээрзин демдегледи.
Чижээлээрге, бир херээжен чолаачы 12 ай дургузунда орук шимчээшкининиң чурумунуң 80 хажыдыышкынын кылган. Дүрген халыткан дээш торгаал 1500 рубль.
2024 чылдың сентябрь 1-ден тура видео-хайгааралдарның турар черлерин солууру планда көрдүнген.
А. ОНДАР.
Чуруктарны ТМГ-ден алган.
“Шын” №44 2024 чылдың июнь 15