Дөрт арат ажыл-агый деткимчени алыр

Тываның Көдээ ажыл-агый болгаш аъш-чем яамызы Тыва Республиканың социал-экономиктиг хөгжүлдезиниң бот-тускай программазы-биле “Агроүлетпүр комплекизиниң материал-техниктиг баазазын экижидери” угланыышкынга субсидия алыр чагыгларны сайгарып көргенин дыңнаткан. Республиканың дөрт арат ажыл-агыйы ИПСЭР шугуму-биле деткимчени алырын яамының комиссиязы шиитпирлээн. Чагыг киирген төлевилелдерни ниитизи-биле 13 млн рубльге акшаландырар.

Бир чыл ажа берген, бүрүткелдиг көдээ бараан бүдүрүкчүлери күрүне деткимчезиниң ол хевиринче кордап болур. Программаның киржикчилери салган негелделерге дүгжүп турары база чогуур документилерни чыып алыры чугула. Көдээ ажыл-агый яамызының албан езунуң курлавырларындан ол негелделерниң даңзызын көрүп болур.
Бо чылын субсидияларны Барыын-Хемчик кожуундан үш база Бай-Тайга кожуундан бир ажыл-агый алыр.

«Алаш» көдээ ажыл-агый бүдүрүлге кооперативинде 644 аът бар. Күрүнеден алыр акшазы-биле мал чеми белеткээр трактор, аңаа кожуглар садып алыр планныг. Тараачын-арат ажыл-агый баштыңы Айлаңмаа Монгуш трактор, картофель олуртур дериг-херексел садып ап, турлаанга кудук кактырар бодалдыг. Сарлык, хой база аъттар тудуп турар «Арыг-Хем» көдээ ажыл-агый бүдүрүлге кооперативи чаа техника аймаа садып алыр. А Бай-Тайгадан ТАА баштыңы Айлаң Иргит 110 аът күштүг МТЗ-1025 тракторну күрүне деткимчезиниң акшазы-биле садар.
Республиканың социал-экономиктиг хөгжүлдезиниң бот-тускайлаң программазының “Агроүлетпүр комплекизиниң материал-техниктиг баазазын экижидери” угланыышкында бо чылдың акша-хөреңгизиниң деткимче хемчээли бүрүнү-биле шиңгээттинмээн болганда, бо чоокку үеде документилер хүлээп алырын база катап чарлаар деп турарын Көдээ ажыл-агый болгаш аъш-чем яамызы дыңнаткан.

“Тыва Республикада сүткүр болгаш эъткир мал ажыл-агыйының хөгжүлдези болгаш көдээ ажыл-агый продукциязының болбаазырадылгазы” угланыышкынга база чагыгларны катап хүлээр. Комиссия шиитпири-биле алырга, бо угланыышкында документ киирген кордакчыларның чаңгызы-даа ийиги чадаже эртпээнин яамы тайылбырлаан. Ооң чылдагааны – киирген документилери долу эвес азы берген документилеринде медээлер шын эвес болганында.

/ ТР-ниң Чазааның парлалга албаны.

"Шын" №28 2023 чылдың апрель 19