Лидия Иргиттиң чаа үнген «Дегбес боо» деп номунда мындыг эге бар: «Дүш-дүл – мээң ийи дугаар чуртталгам-дыр». Ында ол мынчаар бижээн: “...Дүштер кандыг-даа боор. Мен кезээде аас-кежиктиг, бүгү бодум дыштанган азы сагыш-сеткилимни өөрүшкү долган болур, ол бүгүнү дүжүм деп билип чыдар мен. Дүштеримниң хөй кезиинде дээр шаар ужудуушкуннар...”.
Кел чыдар улуг байырлал – Авалар хүнүн уткуштур, чогаадыкчы ажыл-ижиниң 50 чыл болгаш «Ава» солуннуң чырык көрүп үнүп эгелээнинден 10 чыл болган оюн уткуштур Тыва культура төвүнге эрткен чараш байырлалды Лидия Херлииевна баш бурунгаар дүжеп каапкан чадавас. Чүге дээрге чараш хемчег эрткен соонда, ол номунда бижээни дег, бүгү боду дыштанган, аас-кежиктиг, сагыш-сеткили өөрүшкү долган Тываның В. Көк-оол аттыг Национал театрында «Тыва» ансамблиниң юбилейлиг концертинде олурар деп сураг үнген чүве.
Кежээ дугайында кыска медээ бээриниң бетинде, Л.Х. Иргит деп кымыл дээрзин чаңгыс домакка таныштырарга мындыг. Лидия Херлииевна Иргит – ССРЭ-ниң Журналистер эвилелиниң, Россияның Чогаалчылар эвилелиниң кежигүнү, «Тыва Республиканың алдарлыг ажылдакчызы», Тыва радионуң хоочун журнализи, чогаалчы, «М.А. Шолоховтуң төрүттүнгенинден бээр 100 харлааны» деп медальдың эдилекчизи.
Байырлыг кежээде зал долдур Лидия Иргиттиң чогаадыкчы ажыл-ижиниң мөгейикчилери, ооң бижээн очерктериниң, медээлериниң маадырлары база чогаалчының буянныг сеткилинге өөрүп, магадап келген чону чыылган.
Солун хемчегниң башкарыкчызының таныштырылгалыг эге сөстериниң соон дарый, черле өде-чара, дорт-дорт чугаалаар, шоваа чаңы-биле Лидия Херлииевна кежээни боду-ла холга тудуп, «Ава» солунну чырыкче белеткээринге улуг үлүүн киирип чоруур ажылдакчыларга болгаш бижикчилерге Дээди Хуралдың хүндүлел бижиктерин сунуп, аңаа немей бот-хуузунуң белектерин ак кадактар-биле катай өргүп, өөрүшкүзүн чону-биле үлежип, байырны чедирген.
Тываның Чазааның социал политика талазы-биле удуртулганың төлээлери, Тыва Республиканың чогаалчылар эвилелиниң, «Твой Информ» солуннуң даргалары, «Деткимче» тускай хөй-ниити организациязының, Кызыл хоорайның хоочуннар чөвүлелиниң удуртукчулары, Тыва Республиканың Өөредилге яамызындан Национал школа хөгжүдер институттуң директору, «Чаңгыс демниг Россия» партиязының төлээзи дээш кежээге кымнарны келбээн дээр!
Байырлыг хемчегге сөс алган аалчы бүрүзү Л.Х. Иргиттиң кызымак ажыл-ижин, ооң чон-биле сырый харылзаалыг амыдырап чоруурун, журналист мергежилинге бердингенин болгаш чогаал бижиириниң онзагай, бот-тускайлаң аянын онзалап демдеглеп турганнар.
Сценадан көрүкчүлер-биле харылзааны баштак, чиге сөглээр хостуг аажы-чаңы-биле бүдүн залды хаара тудуп турар Лидия Херлииевнаны көөрге, чаптанчыг болду, ооң-биле кады хоочуннарның көргүзүг бүрүзү көрүкчүлерниң сонуургалын, кичээнгейин ап турган.
Номчуштуг, чоннуң ынак, четтикпейн манаары «Ава» солунну бот-идепкейи-биле тургузуп, 10 чылдың дургузунда үзүк-соксаал чокка үндүрүп кээр деп ажыл – эң-не шыдамык, туруштуг, ажылынга бердинген, бергелерге торулбас кижиниң улуг күжү, тура-соруу. Бо кончуг улуг ажылды Л.Х. Иргит чааскаан чүктеп чораанын чон сактып, чогаалчыга улуг үнелелди берген.
Кежээни чараш ыр-шоору, хөгжүмнүг байыр чедириишкиннери-биле хоочуннарның идепкейлиг бөлүктери байлакшыдып, ава дугайында ырылары-биле көрүкчүлерге сагыш-сеткил таалалын өргээннер.
Кайгамчык чараш байырлалга келгеннерниң арын-шырайы чайгаар-ла өөрүшкүлүг тарап чангылааннар.
Дүштериниң хөй кезиинде дээр шаар ужудуушкунда чоруур Лидия Херлииевна чогаадыкчы кежээзинде дүжүнде дег, ужугуп, чыылган чонунуң бедик үнелелинден хей-аът кирип, чалыыткап, чону дээш ам-даа бурунгаар, чогаадыкчы ажылдаар соруктуг дээрзин ооң хып турар карактары, чазык-чараш, долбан чаактарлыг шырайы бадыткап турду.
Силерниң чымыштыг ажыл-ишти бүдүрүп чоруур тура-сорууңарга мөгейдивис, Лидия Херлииевна!
Лидия ООРЖАК, ТР-ниң чогаалчылар эвилелиниң кежигүнү.
«Шын» №90 2023 чылдың ноябрь 25
